2011 թվականի հունվար-հուլիս ամիսներին ՀՀ պետական բյուջեն կատարվել է 10 մլրդ 500 մլն դրամ պակասուրդով՝ կազմելով ինն ամիսների համար նախատեսված 72 մլրդ դրամի ընդամենը 14.6%-ը: Այս մասին տեղեկանում ենք ՀՀ ֆինանսների նախարարության պաշտոնական կայքից:
Նման ցածր ցուցանիշը հիմնականում պայմանավորված է այն հանգամանքով, որ, իննամսյա ծրագրով նախատեսված պետական բյուջեի ազատ միջոցներից 58 մլրդ 300 մլն դրամ օգտագործելու փոխարեն, հունվար-հուլիս ժամանակահատվածում դրանք ավելացել են 1 մլրդ 100 մլն դրամով: Անցած ժամանակահատվածում պետական բյուջեի պակասուրդի ներքին ֆինանսավորումը կազմել է 5 մլրդ 700 մլն դրամ, արտաքին ֆինանսավորումը՝ 4 մլրդ 800 մլն դրամ:
Պակասուրդի ֆինանսավորման ներքին աղբյուրներում պետական բյուջեի պակասուրդը գրեթե ամբողջությամբ ֆինանսավորվել է փոխառու միջոցների հաշվին՝ 5 մլրդ 700 մլն դրամի չափով: Անցած ժամանակահատվածում ՀՀ պետական բյուջեի պակասուրդի արտաքին ֆինանսավորումը կազմել է 4 մլրդ 800 մլն դրամ:
Հունվար-հուլիս ամիսների ընթացքում արտաքին աղբյուրներից ստացվել են շուրջ 33 մլրդ դրամի վարկային միջոցներ:
2011 թվականի առաջին կիսամյակում շուրջ 22 մլրդ 100 մլն դրամ միջպետական վարկ է տրամադրվել ԼՂՀ-ին:
