ԱՄՆ պետքարտուղարի Եվրոպայի ու Եվրասիայի հարցերի օգնական Կարեն Դոնֆրիդը օգոստոսի 1-ին հեռախոսազրույց է ունեցել ոչ միայն Արարատ Միրզոյանի, այլ նաև Բաքվի արտգործնախարար Բայրամովի հետ: Դոնֆրիդը խոսել է հաղորդուղիների ապաշրջափակման ամերիկյան առաջարկի մասին, նաև քննարկել Հայաստան-Ադրբեջան խաղաղության պայմանագրի ուղղությամբ աշխատանքի հեռանկարը: Ուշադրության է արժանի մի հանգամանք: Հայկական կողմի պաշտոնական հաղորդագրության մեջ որևէ խոսք չկա Հայաստանի, Ռուսաստանի և Ադրբեջանի եռակողմ հայտարարությունների կատարման հարց քննարկելու մասին: Այդ մասին նշված է Ադրբեջանի ԱԳՆ հաղորդագրության մեջ, որն ասոււմ է, թե Բայրամովն ու Դոնֆրիդը քննարկել են եռակողմ հայտարարությունների, ինչպես նաև բրյուսելյան գործընթացի շրջանակում պայմանավորվածությունների կատարման ընթացքը: Դետալները կարևոր են: Ինչու՞ է Բաքուն իր պաշտոնական հաղորդագրության մեջ խոսում այդ մասին, իսկ Երևանը՝ ոչ: Ընդ որում, այդ ամենը փաստորեն տեղի է ունենում օգոստոսի 1-ին, երբ Ադրբեջանը, համաձայն Արցախի ՊԲ հաղորդագրության, առավոտից փորձել է սադրանքներ ձեռնարկել շփման գծի հյուսիսային, հյուսիս-արևմտյան հատվածներում և խախտել շփման գիծը, ինչին հակազդել է Արցախի ՊԲ-ն:
Տեղեկացվա՞ծ էր ԱՄՆ պետքարտուղարի օգնականը շփման գծում իրավիճակի մասին, երբ զանգահարում էր Երևան և Բաքու, ու արդյո՞ք զանգը պայմանավորված եղել է նաև այդ հանգամանքով, թե՞ հեռախոսազանգը պլանավորված էր ավելի վաղ և փաստացի ծրագրված շարունակությունն էր պետքատուղար Էնթոնի Բլինքենի զանգերի, երբ նա խոսել էր Նիկոլ Փաշինյանի և Իլհամ Ալիևի հետ, իսկ հետո արդեն նրա օգնականը դետալներ է քննարկում արտգործնախարարների հետ: Այդ դեպքում ինչո՞ւ է Բաքուն գնում իրավիճակի սրման, եթե սպասվում է ԱՄՆ պետքարտուղարի օգնականի հեռախոսազանգ՝ ամերիկյան առաջարկի դետալներ քննարկելու համար: Ադրբեջանը հերքել էր տեղեկությունը, թե կրակել է Ացախի հայկական դիրքերի ուղղությամբ, նշելով, թե դա ապատեղեկատվություն է և ունի հեռուն տանող նպատակներ:
Բաքուն սովորաբար այդպես չի արձագանքում իր սադրանքների վերաբերյալ հայկական կողմի տարածած հաղորդագրություններին: Ի՞նչն է Ադրբեջանի «ոչ սովորական» արձագանքի պատճառը: Սադրանքը չի՞ ստացվել, թե՞ տեղի ունեցածը եղել է կազմակերպված սադրանք ԱՄՆ պետքարտուղարի օգնականի հեռախոսային բանակցության դեմ: Հատկանշական է, որ ռուսական խաղաղապահ կոնտինգենտը օրվա իր ամփոփագրում չի նշել հրադադարի խախտումների մասին, արձանագրելով, որ օգոստոսի 1-ին չեն եղել խախտումներ: Դա տեխնիկակա՞ն, թե՞ քաղաքական «վրիպակ» է, եթե նկատի առնենք նաև Արցախի ՊԲ հաղորդագրության մեջ նշվածը, որ Ադրբեջանի սադրանքների մասին տեղյակ են պահվել ռուս խաղաղապահները: