Այս տարի ընդունելության հիմնական փուլի արդյունքներով բուհերին տրամադրված 1918 անվճար տեղերից համալրվել է 1433-ը, իսկ 21761 վճարովի տեղերից՝ 6518-ը. 550 անվճար ու ավելի քան 15 հազար վճարովի տեղ մնացել է թափուր, այդ թվում՝ ԵՊՀ-ում թափուր է մնացել 817 տեղ (39 անվճար, 778 վճարովի), ԵՊԲՀ-ում թափուր է մնացել 49 տեղ (1 անվճար, 48 վճարովի)։ ՀԱՊՀ-ում (Հայաստանի ազգային պոլիտեխնիկական համալսարան) թափուր է մնացել 583 տեղ 76 անվճար, 507 վճարովի։ Ճարտարապետության և շինարարության Հայաստանի ազգային համալսարան) թափուր է մնացել 884 տեղ (11 անվճար, 873 վճարովի)։ ՀՊՏՀ-ում թափուր է մնացել 121 տեղ։ ՀՊՄՀ-ում թափուր է մնացել 1130 տեղ (26 անվճար, 1104 վճարովի)։ Դիմողների թիվը 66 է։ Վ. Բրյուսովի անվան պետական համալսարանում թափուր է մնացել 537 տեղ։
Այս տարի թափուր տեղերը շատ են, դիմորդները՝ քիչ։ Փորձել ենք մասնավոր բուհերից պարզել՝ ինչ իրավիճակ է նրանց մոտ, արդյոք դիմորդների խնդիր չունեն այս տարի։
Գլաձոր համալսարանի ռեկտոր Ժորա Ջհանգիրյանը «Առաջին լրատվական»-ի հետ զրույցում նշեց, որ իրենք զբաղված են բժշկական կրթության իրականացումով՝ բուժգործ և ստոմատոլոգիա:
«Մենք անցած տարի լիցենզիա ենք հանել բժշկական կրթություն իրականացնելու համար և մենք այս տարվանից ուզում ենք այդ կրթությունը դարձնել իրականություն: Մենք բժշկական կրթություն ենք իրականացնելու և Հայաստանի քաղաքացիների համար, և օտարերկրացիների: Եվ քանի որ մենք նոր ենք բժշկական կրթություն իրականացնում, հիմնական դիմորդները հենց արտասահմանցիներն են»,-ասաց նա:
Հարցին՝ արդյոք բժշկական համալսարանից ավելի մատչելի է ուսման վարձը, Ջհանգիրյանը ասաց, որ իրենք փորձել են այնպես անել, որ իրենց ուսման վարձը և պետական բժշկական համալսարանի ուսման վարձը համարյա նույնը լինեն:
Հարցին՝ մյուս մասնագիտություններով դիմորդների թվի նվազում կա՞, ասաց, որ եթե ասի շատ լավ, դա այդպես չի, որ ասի շատ վատ է, այդպես էլ չի: «Պետք է բավարարվել և քչով, և շատով»,-ասաց նա:
Հյուսիսային համալսարանից «Առաջին լրատվական»-ին տեղեկացրին, որ երկու փուլի քննություններն անցկացվել են, արդյունքներով համարյա մոտ 60 հոգի արդեն ընդունվել է:
«Ապրիլից քննությունը կար նրանց համար, որոնք նոր ավարտած չէին:Եվս 60 դիմորդ կմասնակցեն օգոստոսի 20-ից հետո կյանալիք քննությանը: Նախորդ տարի ավելի շատ դիմորդ ունեինք»,-ասացին համալսարանից:
Մովսես խորենացու անվան համալսարանի ռեկտոր Արթուր Աղաբաբյանն էլ մեզ հետ զրույցում նշեց, որ այս իրավիճակում, երբ բոլորի մոտ թափուր տեղեր են մնացել, բնականաբար, մտահոգվելու առիթ կա:
«Բոլոր դեպքերում, եղած իրավիճակում դիմորդներ ունենք: Մեր խնդիրները բավարար չափով լուծում ենք»,-ասաց Աղաբաբյանը:
Դիմորդները հիմնականում դիմել են իրավագիտություն, մանկավարժություն, տնտեսագիտություն, բանասիրություն, ծրագրավորում:
Արդյոք պրոֆեսորադասախոսական կազմից կրճատումներ արվո՞ւմ են, ռեկտորը նշեց՝ քանի որ վերջին տարիներին ընդունվողների թիվը նույն վիճակում է, կրճատումների խնդիր սուր ձևով չի դրվում, բայց ամեն կիսամյակի սկզբից նայվում է ընդհանուր պահանջարկը, ժամաքանակը, կախված որ մասնագիտությամբ քանի մասնագետ է պետք, դարան հմապատասխան մասնագետների խնդիրը լուծում են:
Նա նաև նշեց, որ չունեն այնպիսի մասնագիտություն, որտեղ դիմորդ այս տարի չկա: