Չինաստանի արտգործնախարարության խոսնակը հայտարարել է, որ Պեկինը «լրջորեն պատրաստվում» է ԱՄՆ Ներկայացուցիչների պալատի դեմոկրատ խոսնակ Նենսի Փելոսիի Թայվան կատարելիք այցին: Այցը սպասվում է օգոստոսին, համենայն դեպս ըստ նախապես ազդարարվածի: Նենսի Փելոսին առայժմ չի խոսել այցը չեղարկելու մասին: Պեկինը հայտարարել է, որ իր համար անընդունելի է Թայվան կատարելիք այց այցը: Օրերս եղավ տեղեկություն, որ Սպիտակ տունը մտահոգ է Փելոսիի մտադրության կապակցությամբ: Տեղեկությունը անանուն էր:
ԱՄՆ նախագահ Բայդենի վարչակազմը առայժմ չի հայտնել պաշտոնական դիրքորոշում: Ջո Բայդենը օրերս հայտարարեց, որ առաջիկա տասնօրյակի ընթացքում ծրագրում է հեռավար զրույց ունենալ Չինաստանի նախագահ Սի Ցզինպիի հետ: Չի բացառվում, որ այդ զրույցի ընթացքում էլ կկայացվի որոշում Թայվան այցի առնչությամբ, իսկ առայժմ կողմերը հնարավոր է «բարձրացնում են գինը՝ ԱՄՆ չի հայտարարում այցը չեղարկելու մասին, իսկ Պեկինը հայտարարում է դրան «լրջորեն պատրաստվելու» մասին: Ընդ որում, փորձագիտական հանրույթը գնահատում է, թե ինչ կարող է նշանակել «լրջորեն պատրաստվելը»:
Կա տեսակետ, որ Պեկինը ռազմական օդանավերի միջոցով վայրէջք կհարկադրի ԱՄՆ Ներկայացուցիչների պալատի խոսնակին, եթե վերջինը փորձի այդուհանդերձ կատարել այցը Թայվան: Դա գործնականում կնշանակի ամերիկա-չինական լարվածության այնպիսի աստիճան, որը ոչ միայն կլինի շատ դժվար հաղթահարելի, այլ նաեւ կարող է դառնալ բավականին լուրջ կոնֆլիկտային ծավալման, իսկ հնարավոր է նույնիսկ Թայվանի հանդեպ Չինաստանի գործողությունների պատճառ կամ առիթ: Այդ կերպ կստացվի, որ ԱՄՆ մի կողմից «պրոքսի պատերազմի» մեջ է ՌԴ հետ Ուկրաինայում, իսկ մյուս կողմից կարող է այդպիսի պատերազմի մեջ հայտնվել Չինաստանի հետ՝ Թայվանում: Ունի՞ Չինաստանին էլ այդ մաշող պատերազմի ռեժիմ ներքաշելու սցենար Վաշինգտոնը: Բարդ է ասել, բայց որ Թայվաննի ուղղությամբ կատարվող խաղադրույքները բարձրանում են նկատելիորեն, ակնառու է:
