Վարչապետ Նիկոլ Փաշինյանի գլխավորությամբ հուլիսի 14-ին տեղի է ունեցել խորհրդակցություն Քաղաքացիական ավիացիայի կոմիտեում նախատեսվող համակարգային բարեփոխումներին վերաբերյալ։ Մասնավորապես, անդրադարձ է կատարվել կոմիտեի գործունեությանը, կառուցվածքին, բարձրակարգ մասնագետների ներգրավմանը, թռիչքային անվտանգության ապահովմանը, օդաչուների ու այլ կադրերի վերապատրաստմանը և այլ հարցերի: Քննարկվել են նաև ավիացիոն ոլորտում առկա խնդիրներն ու դրանց լուծման ուղղությամբ իրականացված ու առաջիկայում նախատեսվող միջոցառումները: Խորհրդակցությանը մասնակից գերատեսչությունների ներկայացուցիչները հանդես են եկել տարբեր դիտարկումներով ու առաջարկություններով: Վարչապետ Փաշինյանը նշել է, որ կառավարության ռազմավարական նպատակն է հայկական ավիացիան համապատասխանեցնել միջազգային լավագույն չափանիշներին: Գործադիրի ղեկավարը հանձնարարել է շարունակել քննարկումները և դրանց արդյունքներով լրամշակել բարեփոխումների փաթեթը։
Այս առնչությամբ, ավիացիոն հարցերով փորձագետ Նավիկ Խաչատրյանը «Առաջին լրատվական»-ի հետ զրույցում նշեց, որ Հայաստանի քաղաքացիական ավիացիան տարիներով զիջում է համաշխարհային ավիացիայի միտումներին. «Մեզ մոտ չկա ավիացիոն կադրերի ուսուցում, մեզ մոտ գոյություն ունի ազգային փոխադրող, որը ստացվել է ուրիշ երկրի ընկերության հետ համատեղ: Ամբողջ աշխարհում միջազգային ավիացիայի ոլորտում նման բան չկա: Ես չեմ սպասում շեշտակի ինչ-որ զարգացումներ: Մենք չունենք կադրային ռեսուրս, և չեմ կարծում, թե մոտակա ժամանակներում կունենանք լավագույն ավիացիան, որի մասին խոսում է վարչապետը: Ես ինքս տեսնում եմ համաշխարհային ավիացիայում միտումները, այդ թվում բեռնափոխադրումների ուղղությամբ, որը շատ մեծ տեղ է զբաղեցնում ներկայիս ավիացիոն գործունեության մեջ: Համավարակից ու պատերազմից հետո միակ ճիշտ ուղղությունը դա էր՝ բեռնատար օդանավերի բերում և բեռնափոխադրումների կատարում: Եթե դա տեղի ունենա, ես կհամարեմ, որ կա առաջ գնալու միտում: Հակառակ դեպքում Հայաստանն ունի փոքր օդանավերով ընկերություններ, որը չի տալիս այն հիմքը, որ ավիացիան շեշտակի զարգանա»,-ասաց փորձագետը:
Հարցին, թե արդյոք ոլորտում կադրային փոփոխությունները հույս ներշնչո՞ւմ են, որ դրական փոփոխություններ կլինեն, Նավիկ Խաչատրյանը բացասական պատասխան տվեց. «Ես նման շանս չեմ տեսնում: Այդ միտումներից մենք շատ հեռու ենք: Համաշխարհային ավիացիան շատ առաջ է գնացել մեզնից, և ես չեմ համարում, որ մենք կարող ենք հասնել իրենց կամ գոնե մոտենալ, որքան էլ վարչապետը խոսի:
Դրան հասնելու ճանապարհները ոչ թե փողն է, այլ ճիշտ մոտեցումը: Այսինքն պետք է Պոլիտեխնիկի համապատասխան բաժինը օդային տրանսպորտին վերաբերող ֆակուլտետը վերաբացվի, գումար դնեն, ստեղծվի առանձին ուսուցման կենտրոն, դա լավ ղեկավարվի: Դրանից հետո նոր հնարավոր է ինչ-որ դրական տեղաշարժ:
Առանց ավիացիոն կադրերի ո՞նց կարելի է խոսել ոլորտի շեշտակի զարգացման մասին: Դա նույնն է, որ պատերազմին պատրաստ չլինես ու գնաս պատերազմ: Կադրեր չունենաս, զենք չունենաս ու ասես՝ կմասնակցեմ ու կհաղթեմ պատերազմում: Ցանկությունը մի բան է, իրականությունը մեկ այլ բան: Հնարավոր չէ եղած պայմաններում խոսել բարձր թեմաներից»,-ընդգծեց նա:
Փորձագետը նկատեց, որ բոլոր եվրոպական երկրներն ունեն ավիացիայի ուսուցման կենտրոններ, իսկ մենք չունենք. «Այնտեղ պետությունը դրամական միջոցներ է դնում դրա վրա, որովհետև հասկանում են՝ ավիացիան ինչ ոլորտ է, իսկ մեզ մոտ վաղուց չեն հասկանում, դրա համար երիտասարդ աղջիկ է Քաղավիացիայի կոմիտեի պետը, որը վարի տվեց ամբողջ ոլորտը, մեզ գցեց «սև ցուցակ» և մենք չգիտենք՝ դրանից դուրս կգանք, թե ոչ: Կոմիտեի նոր նախագահը հայտարարեց, որ եղած թիմով դուրս կգան «սև ցուցակից», բայց դա հնարավոր չէ առանց ճիշտ մոտեցումների, առանց ավիացիոն ուժեղ կադրերի ներգրավման: Եղած թիմը վարի է տվել ոլորտը: Ու հիմա Քաղաքացիական ավիացիայի նոր նախագահը այդ նույն թիմով ուզում է դուրս գալ այս վիճակից, դա հնարավոր չէ: Ավիացիայում կադրային ուժեղ սով կա: Լավ կադրերն արդեն 65-ն անց են, նոր կադրեր չեն պատրաստվում»,-ասաց նա:
