Հուլիսի 27-ին տեղի կունենա դատավորների ընդհանուր ժողով՝ Երևան քաղաքի առաջին ատյանի ընդհանուր իրավասության դատարանի Աջափնյակ-1 նստավայրի վարչական շենքում: Օրակարգում ներառված է Բարձրագույն դատական խորհրդի դատավոր անդամի ընտրության հարցը: Ընտրություն պետք է կատարվի առաջին ատյանի դատավորներից։ Չի բացառվում, որ կին թեկնածու առաջադրվի, քանի որ ըստ օրենքի՝ կին դատավորների ներգրավվածությունը որոշակի համամասնությամբ պարտադիր է։
Այս պահին ԲԴԽ-ում մեկ կին դատավոր կա՝ Անի Մխիթարյանը։ Եվ հիմա պետք է Բարձրագույն դատական խորհրդի կին դատավոր անդամ առաջադրվի։ Չի բացառվում, որ առաջադրեն Երևան քաղաքի առաջին ատյանի ընդհանուր իրավասության դատարանի դատավոր Զարուհի Նախշքարյանին, քանի որ նա դատավորների շրջանում ընդունված կերպար է։
Այս պահին ԲԴԽ-ում երեք թափուր տեղ կա, մեկ դատավորի հաստիք, երկու գիտնականի։ Գիտնական անդամներին պետք է առաջադրի և ընտրի ԱԺ-ն, իսկ դատավորը պետք է ընտրվի Դատավորների ընդհանուր ժողովի կողմից։
Լուսանկարը` «Առավոտ»-ի
