Բասկետբոլի Հայաստանի ազգային հավաքականը փոքր եկրկրների Եվրոպայի առաջնության կիսաեզրափակչում է։ Առաջին տուրում 100։63 հաշվով Ջիբրալթարին հաղթելուց հետո, երեկ մեր ազգային թիմը 78։66 հաշվով առավելության հասավ Սան Մարինոյի նկատմամբ, B ենթախմբում գրավելով առաջին հորիզոնականը։ Հանդիպման ամենաարդյունավետ խաղացող է ճանաչվել Անդրե Սպայթ Մկրտչյանը: Նա վաստակել է 25 միավոր, 4 անգամ տիրել օղակից անդրադարձող գնդակին և կատարել 3 արդյունավետ փոխանցում: Երկու անընդմեջ հաղթանակը հնարավորություն տվեց մեր հավաքականին այսօր հանգստանալու և պատշաճ կերպով նախապատրաստվելու վաղը կայանալիք կիսաեզրափակչին։ A և B խմբերում երկրորդ և երրորդ տեղերը զբաղեցրած թիմերն այսօր քառորդ եզրափակչում վիճարկելու են կիսաեզրափակչի վերջին երկու ուղեգրերը։ Անդորրայի հավաքականը մրցելու է Ջիբրալթարի, իսկ Սան Մարինոն՝ Ադրբեջանի հետ։ Վաղը մեր հավաքականը կհանդիպի Անդորրա-Ջիբրալթար զույգի հաղթողի հետ։ Ադրբեջան-Սան Մարինո զույգի հաղթողը կիսաեզրափակչում կհանդիպի Մալթային։ Վերջինս երեկ լարված պայքարում հաղթելով Անդորրային հաղթող ճանաչվեց A ենթախմբում։
Հավանականությունը բավական մեծ է, որ կիրսաեզրափակչում Հայաստանի ազգային թիմը կմրցի Անդորրայի հետ։ Վերջինս կարգով զգալի գերազանցում է Ջիբրալթարին և ամենայն հավանականությամբ այսօր կհաղթի։ Նշենք, որ երեկ Սան Մարինոյին պարտվելու դեպքում Հայաստանի հավաքականը ստիպված էր լինելու այսօր մրցել Ադրբեջանի հետ։ Փոքր երկրների Եվրոպայի առաջնությունում Հայաստան-Ադրբեջան դիմակայությունը հնարավոր է միայն եզրափակչում կամ երրորդ տեղի համար մրցավեճում։ «Շատ ուրախ եմ, որ հաղթեցինք: Մինչև խաղն արդեն վերլուծել էինք մրցակցին, հասկացել էինք՝ ինչպիսի խաղ են ցուցադրում: Անկեղծ ասած գիտակցում էինք, որ մեր խաղային մակարդակն ավելի բարձր է:Մեր թիմը համալրել է Քրիս Ջոնսը, ով բավականին ուժեղ խաղացող է: Նա մեզ նոր է միացել, պարզ է՝ խաղի սկզբում մի փոքր դժվար էր, քանի որ տարբեր կոմբինացիաներ էինք փորձարկում, բայց, ընդհանուր առմամբ, հանդիպման վերջնամասում ավելացրինք և կարողացանք միավորներով բավականին առաջ անցնել:Հաջորդ խաղերը շատ կարևոր են, զգում եմ, որ ավելին կարող եմ: Ամեն ինչ կանենք, որ յուրաքանչյուր խաղում հաղթենք և հասնենք մեր նպատակին»,- խաղից հետո ասել է Հայաստանի հավաքականի առաջատարներից Ալբերտ Թադևոսյանը: Ուշագրավ վիճակագրական փաստեր։ Ընթացիկ առաջնությունում բոլոր 6 հավաքականների խաղացողներից այս պահին լավագույն արդյունքը պատկանում է Անդրե Սփաթ-Մկրտչյանին։
Վերջինս երկու խաղում ճանաչվելով խաղի ամենաարդյունավետ խաղացող արդեն իսկ վաստակել է 55 միովոր։ Սա բավական բարձր ցուցանիշ է։ Հավաքականների հաշվարկում ևս Հայաստանն առաջինն է։ Եվ այսպես, երկու հանդիպումների արդյունքում մեր գլխավոր թիմը վաստակել է 178 միավոր։ Համեմատության համար նշենք, որ երկրորդ տեղում գտնվող, A խմբի հաղթող Մալթային ազգային թիմը երկու խաղում վաստակել է 145 միավոր։ Լավագույն եռյակը եզրափակող Անդորրան վաստակել է 142 միավոր։ Վիճակարգրական տվյալները վկայում են, որ Հայաստանի ազգային թիմը ընթացիկ առաջնությունում իսկապես գլխավոր ֆավորիտն է։ Հիշեցնենք, որ Հայաստանի հավաքականը 2016 թվականին հաղթող էր դարձել փոքր երկրների Եվրոպայի առաջնությունում։ Վստահաբար կարող ենք ասել, որ կան բոլոր նախադրյալները այդ հաջողությունը կրկնելու։ Կարևոր արձանագրում․ Ռեքս Քալամյանի գլխավորությամբ մեր հավաքականը խաղից խաղ որակական աճ է գրանցում։ Ինչ խոսք խմբային փուլում մրցակիցները կարգով ցածր էին, բայց․․․։
Փոքր երկրների Եվրոպայի առաջնությանը մասնակցող հավաքականներից ամենաբարձր վարկանիշն ունի Անդորրան։ Վերջինս ՖԻԲԱ-ի դասկարգման աղյուսակում այս պահին 88-րդն է և 5 կետով գերազանցում է Հայաստանի ազգային հավաքականին։ Մալթայի ընտիանին գտնվում է 94-րդ հորիզոնականում։ Մյուս հավաքականների վարկանիշը անհամեմատ ավելի ցածր է։