Հայ-ֆրանսիական ապակենտրոնացված համագործակցության չորրորդ համաժողովին մասնակցելու նպատակով այս տարվա հունիսի 28-ից հուլիսի 1-ը Լիոն է գործուղվելու 20 հոգուց բաղկացած պատվիրակություն: Պատվիրակության կազմում մեծ թիվ են կազմում մարզպետները, իսկ պատվիրակությունն էլ ղեկավարում է ՀՀ տարածքային կառավարման և ենթակառուցվածքների
նախարարի տեղակալ Վաչե Տերտերյանը:
Մասնավորապես, պատվիրակության կազմում են ՀՀ առողջապահության նախարարի տեղակալ Արտակ Ջումայանը, Գեղարքունիքի մարզպետ Կարեն Սարգսյանը, Լոռու մարզպետ Արամ Խաչատրյանը, Արմավիրի մարզպետ Էդվարդ Հովհաննիսյանը, Շիրակի մարզպետ Նազելի Բաղդասարյանը, Տավուշի մարզպետ Հայկ Ղալումյանը, նրա տեղակալը, Սյունիքի մարզպետի տեղակալը, Սյունիքի մարզպետի խորհրդականը և մեծ թվով այլ աշխատակիցներ տարբեր գերատեսչություններից:
Այս առնչությամբ Ֆրանսիական Վիեն քաղաքի փոխքաղաքապետ Լևոն Սաքունցը «Առաջին լրատվական»-ի հետ զրույցում նշեց. «Ապակենտրոնացված համագործակցության համաժողովն է անցկացվելու Լիոնում և թվով 3-րդ կամ 4-րդն է: Առաջինը եղել է 2010 թվականին: Իմաստն այն է, որ Հայաստանի և Ֆրնսիայի այն բոլոր քաղաքները, որոնք իրար մեջ համագործակցություն ունեն, օրինակ, ինչպես Երևանն ու Լիոնը, Գորիսն ու Վիենը, Սևանն ու Գրենոբլը, որխպեսզի բոլորը հավաքվեն մի տեղում և ամփոփեն ընդհանուր աշխատանքը, հասկական՝ որ համագործակցությունն է ստացվում և ընդհանուր ուղիներ որոշեն ապագա համագործակցության ընդլայնման համար: Այսինքն երկու երկրների համագործակցության մասին է խոսքը, բայց տարածքային մակարդակով: Խոսքը ոչ միայն քաղաքների, այլև մարզերի մակարդակով համագործակցության մասին է»,-ասաց նա:
Լևոն Սաքունցի խոսքով, նմանատիպ համաժողովները մեկ անգամ լինում են Հայաստանում, մեկ անգամ՝ Ֆրանսիայում. «Վերջին անգամ ես ներկա եմ եղել մի անգամ Երևանում, մեկ անգամ էլ Վալանս քաղաքում»:
Անդրադառնալով պատվիրակության թվաքանակին, նա նկատեց, որ հայկական լրատվամիջոցներում ճիշտ չի նշվել, իրականում միայն Հայաստանից 80 հոգի է ժամանելու համաժողովին. «Մոտ 10-15 համայնքներ ունեն համագործակցություն, բայց կան նաև այլ բնակավայրեր, որոնք ինչ-որ ձևով համագործակցում են և ըստ համագործկցության ոլորտների նաև նախարարություններն են ներկայացված: Քանի որ տարբեր համայնքների միջև կան, օրինակ, առողջապահության ոլորտում աշխատանքներ, և այդ աշխատանքների շրջանակում երկու կողմերն օգտվում են առողջապահության նախարարության կոմպետենցիաներից, նախարարությունն էլ է ներկայացված լինելու թե հայկական, թե ֆրանսիական կողմից: Նաև հասրակական կազմակերպություններ են ներկայացված լինելու, մոտ 80 հոգի է լինելու հայկական պատվիրակությունը: Միջոցառումը տեղի է ունենալու հունիսի 29-30-ին: Կլինեն կլոր սեղաններ, ոլորտային քննարկումներ: Խոսելու են Երևանի և Լիոնի քաղաքապետները: Վերջում նաև երեկույթ է կազմակերպվելու: իսկ արդեն հունիսի 30-ի կեսօրից հետո այցելություններ կլինեն տարբեր կառույցներ՝ տեսնելու համար, թե տեղերում ինչպես է կիրառվում համագործակցության այն կետերը, որոնք իրենք քննարկել են»,-ասաց Լևոն Սաքունցը:
Նրա խոսքով, քննարկվելու է, թե ինչպես ավելի արդյունավետ համագործակցել, ինչպես ֆրանսիական փորձը օգտագործել Հայաստանում, որոնք են համագործակցության ճյուղերը և ինչպես կարող են դրանք զարգացնել. «Օրինակ, եթե վերցնենք զբոսաշրջության ոլորտը, բնականաբար, համագործակցության իմաստը ֆրանսիական փորձը Հայաստանում օգտագործելն է: Պետք է նայել, թե որքանով են հայկական և ֆրանսիական ընկերությունները միասին աշխատել այդ ուղղությամբ և ապագայում ինչ նոր համագործակցության ուղիներ կարող են գտնել»: