Ֆրանսիայի նախագահ Նիկոլա Սարկոզին նախատեսում է այցելել Լիբիա այն բանից հետո, երբ կձերբակալվի Լիբիայի առաջնորդ Մուամար Քադաֆին: Այս մասին հաղորդում է Le Parisien-ը` հղում կատարելով Ելիսեյան պալատում իր աղբյուրին: Աղբյուրի հաղորդած տեղեկության համաձայն` Սարկոզին Լիբիա կմեկնի Մեծ Բրիտանիայի վարչապետ Դևիդ Քեմերոնի հետ:
Թերթը գրում է, որ Սարկոզին ցանկանում է այդ այցելությունն արագ կազմակերպել, սակայն այն հավանաբար տեղի կունենա Փարիզում մեկնարկելիք «Լիբիայի ընկերներ» համաժողովից հետո, որը նախատեսված է այս տարվա սեպտեմբերի 1-ին: Սարկոզին ոչ միայն Տրիպոլիում է լինելու, այլ նաև Բենղազիում կամ Միսուրատայում:
