Հունիսի 12-ին ոստիկանության Շենգավիթի բաժնում հիվանդանոցից ահազանգ էր ստացվել, որ շտապօգնության խումբը Բագրատունյաց փողոցից, դանակահարված վիճակում, բուժօգնության է տեղափոխել 23-ամյա երիտասարդի: Տուժածն ի վիճակի չէր հաղորդում տալու։ Հիվանդանոց մեկնած օպերատիվ խմբի ծառայողները տուժողի հորից հաղորդում են ընդունել։ Ըստ տղամարդու՝ ժամը 17.30-ի սահմաններում անհայտ անձը սուր-կտրող գործիքով խփել էր որդուն:
Անհայտ անձի ինքնությունը պարզելու ուղղությամբ Շենգավիթի քրեական հետախույզների ձեռնարկած միջոցառումների արդյունքում ստացվել են դեպքի բացահայտմանն անհրաժեշտ օպերատիվ տեղեկությունները։ Համագործակցելով ոստիկանության Երևան քաղաքի վարչության քրեական հետախույզների հետ՝ Շենգավիթի ոստիկանները պարզել են, որ վիճաբանության ժամանակ երիտասարդին մարմնական վնասվածք պատճառել էր մասիսցի 41-ամյա մի տղամարդ։
Նա ժամը 23.40-ին հայտնաբերվել ու, «Նիսան» մակնիշի ավտոմեքենայով հանդերձ, բերման է ենթարկվել ոստիկանության Շենգավիթի բաժին: Նա ներկայացվել է տարածքային քննչական մարմնին ու ձերբակալվել։ Դանակը հայտնաբերվել է։ Հարուցված քրեական գործի նախաքննությունը շարունակվում է։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: