Հայ ազգային կոնգրեսը քիչ առաջ հանդես է եկել հետևյալ հայտարարությամբ:
«Օգոստոսի 16-ին տեղին ունեցավ Հայ Ազգային Կոնգրես-իշխանություններ երկխոսության 5-րդ ռաունդը, որը, Կոնգրեսի պատվիրակության պնդմամբ, ամբողջությամբ նվիրվեց օգոստոսի 9-ին Կոնգրեսի երիտասարդ ակտիվիստների և ոստիկանության աշխատակիցների միջև տեղի ունեցած միջադեպի հետևանքով ձերբակալված երեք երիտասարդների ազատ արձակման խնդրի քննարկմանը: Այդ օրը, երկխոսության ընթացքում առաջին անգամ որոշվեց, հարգելով իշխանության պատվիրակության խնդրանքը, առայժմ չհրապարակել քննարկման մանրամասները: Պատվիրակությունը նման խնդրանք ներկայացրեց, պատճառաբանելով, որ դա կհեշտացնի խնդրի լուծումը:
Քանի որ հակառակ Կոնգրեսի պատվիրակության սպասումների, խնդիրը այդպես էլ չստացավ լուծում, ժամանակն է հրապարակել թե ինչ է տեղի ունեցել բանակցությունների վերջին երկու ռաունդներում:
5-րդ ռաունդի հենց սկզբից Կոնգրեսի պատվիրակությունը հայտարարեց, որ բանակցությունների բնականոն ընթացքի համար անհրաժեշտ է լուծել ձերբակալված երիտասադների խնդիրը: Նաև պարզաբանեց, որ ունի կատարվածի իր վարկածը, որը ամբողջությամբ ժխտում է ոստիկանության հնարովի վարկածը: Նշվեց, որ ոստիկանության ներկայացրած վարկածի կեղծիքը, երիտասարդների նկատմամբ բռնություններն ու դրանց աննախադեպ դաժանությունը, փաստաբանների ապօրինի ազատազրկումը և նրանց նկատմամբ կատարված բռնությունները, գործին ներգրավվելու մերժումը և դրանից բխող ձերբակալության ապօրինությունը վկայում են, որ գործ ունենք հալածանքների հետ, որոնք կրում են ակնհայտորեն քաղաքական բնույթ, ուստի Կոնգրեսն իրեն իրավունք է վերապահում բոլոր ձերբակալվածներին դիտարկելու որպես քաղբանտարկյալներ: Պատվիրակությունը հայտարարեց, որ հնարավոր չէ բանակցել քաղաքական բանտարկյալների առկայության պայմաններում, առաջարկեց որպես առաջնահերթություն լուծել բոլորի խափանման միջոցը փոխելու հարցը: Որպես լուծում, իշխանության պատվիրակությանն առաջարկվեց ստորագրել հետևյալ փաստաթուղթը.
Իշխող Կոալիցիայի աշխատանքային խմբի և Հայ Ազգային Կոնգրեսի պատվիրակության ներկայացուցիչներս. Դավիթ Հարությունյանը, Գագիկ Մինասյանը, Վարդան Բոստանջյանը, Նաիրա Զոհրաբյանը, Մհեր Շահգելդյանը, Խաչիկ Հարությունյանը և Լևոն Զուրաբյանը, Դավիթ Շահնազարյանը, Ֆելիքս Խաչատրյանը, Սամվել Աբրահամյանը, Վահագն Խաչատրյանը`
• իշխանության և ընդդիմության երկխոսության գործընթացի համար բարենպաստ մթնոլորտ ապահովելու և փոխադարձ վստահության բարձրացմանն ուղղված քայլերի իրականացման նպատակով,
• գիտակցելով, որ Հայ Ազգային Կոնգրեսի երիտասարդ ակտիվիստների և ոստիկանության աշխատակիցների միջև օգոստոսի 9-ի միջադեպի հետևանքով առաջացած լարվածությունը պետք է լիցքաթափվի Հայաստանի օրենքների պահանջների, միջադեպի թափանցիկ և օրինական քննության ապահովման և անմեղության կանխավարկածի սկզբունքի հարգման հիման վրա,
1. Ընդունում են իշխող Կոալիցիայի տված երաշխիքները, որ իշխանությունները ամեն ինչ կանեն, որ իրավապահ մարմինները օրենքի պահանջներին համապատասխան լրջագույնս քննեն ինչպես ոստիկանության պնդումները` երիտասարդ ակտիվիստների հակաօրինական գործողությունների մասին, այնպես էլ ընդդիմության ակտիվիստների պնդումները` իրենց և իրենց փաստաբանների նկատմամբ ոստիկանության կողմից բռնության կիրառման և իրավունքների ոտնահարման մասին, ինչպես նաև իրենցից կախված բոլոր անհրաժեշտ միջոցները կձեռնարկեն, որ Տիգրան Առաքելյանի, Արտակ Կարապետյանի և Սարգիս Գևորգյանի նկատմամբ որպես խափանման միջոց կիրառվի անձնական երաշխավորությունը
2. Ընդունում են Հայ Ազգային Կոնգրեսի տված երաշխիքները, որ կապահովվի վերոնշյալ անձանց պատշաճ վարքագիծը, քրեական վարույթն իրականացնող մարմնի կանչով նրանց ներկայանալը և այլ դատավարական պարտականությունների կատարելը
Կոնգրեսի պատվիրակությունը պատճառաբանեց, որ այս քաղաքական գործընթացը լիովին տեղավորվում է Քրեադատավարական օրենքի շրջանակների մեջ, ապահովում է բաց դատաքննության հնարավորությունը, որի շրջանակներում էլ կպարզվի, արդյոք որևէ մեկը քրեորեն պատժելի արարք է կատարել:
Իշխանությունների պատվիրակությունը ժամանակ խնդրեց հարցը քննարկելու և պատասխանելու համար: Այնուհետև փոխվեցին Արտակ Կարապետյանի և Սարգիս Գևորգյանի խափանման միջոցները, իսկ օգոստոսի 23-ին տեղի ունեցած 6-րդ ռաունդի ժամանակ իշխանությունները թեև մերժեցին Կոնգրեսի ներկայացված փատաթղթի ստորագրումը, փոխարենը հավաստիացումներ տրվեցին, որ իրավական «ոչ խտրական» գործընթացը կտարածվի բոլորի վրա: Պատասխան խոսքում Կոնգրեսի պատվիրակությունը հայտարարեց, որ իշխանությունների հավաստիացումները հեռացնում են բանակցությունների շարունակման համար վերջին խոչնդոտը և առաջարկեց շարունակել օրակարգային հարցով բովանդակային քննարկումները:
Հանդիպման վերջում պայմանավորվածություն ձեռք բերվեց լրագրողների առջև փոխհամաձայնեցված հայտարարություններով հանդես գալ, որի հետևանքով Կոնգրեսի պատվիրակության ղեկավարը հանդես եկավ հետևյալ հայտարարությամբ. «Ինչպես պայմանավորվել էինք, այսօր շարունակեցինք քննարկել օգոստոսի 9-ի միջադեպը և դրա հետ կապված զարգացումները: Քննարկման արդյունքում կարող եմ ասել, որ մենք վստահ ենք, որ Տիգրան Առաքելյանի խափանման միջոցը փոխելու հարցը արագորեն կկարգավորվի: Դա նկատի ունենալով` մենք անցել ենք օրակարգային հարցի քննարկմանը և լսել ենք իշխանությունների տեսակետը»:
Ելնելով վերոշարադրյալից Հայ Ազգային Կոնգրեսի պատվիրակությունը հայատարարում է.
1. Հակառակ փոխադարձ պայմանավորվածությունների և տրված հավաստիացումների, Տիգրան Առաքելյանի խափանման միջոցը մինչ օրս փոխված չէ:
2. Օգոստոսի 9-ի միջադեպի հետևանքով առաջացած քաղաքական լարվածության հաղթահարման նպատակով Հայ Ազգային Կոնգրեսի քայլերը, որոնք ուղղված են երկխոսության շուրջ վստահության և կառուցողական մթնոլորտի ստեղծմանը, չեն արժանանում իշխանությունների կողմից համարժեք ընդառաջ քայլերի:
3. Հայ Ազգային Կոգրեսի երաշխիքներով Տիգրան Առաքելյանի խափանման միջոցը` օրենքով նախատեսած անձնական երաշխավորության խափանման միջոցով փոխարինելու մերժումը վկայում է, որ իշխանությունները ցանկանում են օգտագործել Առաքելյանի կալանավորումը որպես Կոնգրեսից քաղաքական զիջումներ կորզելու համար ճնշման լծակ: Դրանով ամրապնդվում է Տիգրան Առաքելյանի` քաղաքական բանտարկյալ լինելու հանգամանքը և դրա հետևանքով երկխոսությունը վերածվում է քաղաքական պատանդների առևտրի:
4. Մերժելով Հայ Ազգային Կոնգրեսի երաշխիքները նման հարցում, իշխանությունները ցույց են տալիս, որ պատրաստ չեն կառուցել հարաբերությունները վստահության հիման վրա և հարցականի տակ են դնում շատ ավելի մեծ փոխվստահություն պահանջող և պետության և ժողովրդի ճակատագրին վերաբերող ներքաղաքական հարցերի շուրջ համաձայնության ձեռքբերման որևէ հնարավորություն:
5. Չկարողանալով ապահովել ուղիղ եթերով երկխոսության հեռարձակման կամ Կոնգրեսին ամեն ռաունդից հետո կես ժամ ուղիղ եթեր տրամադրելու տարրական պահանջների կատարումը, կամ վերացնել Հանրային հեռուստատեսությամբ և մյուս հեռուստաալիքներով Կոնգրեսի հանրահավաքների մասին իրազեկող նյութերի հեռարձակման արգելքը, ինչպես նաև հանրահավաքներից առաջ իրավապահ մարմինների կողմից բնակչության ահաբեկումը, տարաբնույթ խոչնդոտների հարուցումը, մասնավորապես հանրային և այլ տրասնպորտային միջոցների աշխատանքի կազմալուծումը, իշխանության պատվիրակությունը կասկածի տակ է դնում իր իսկ պնդումները իր լայն լիազորությունների մասին, և, ընդհանրապես, իր վստահելիությունը:
6. Վերջին օրերին իշխանությունների ճնշման ներքո մի շարք հանգստյան տների ղեկավարները չեղյալ են համարել Կոնգրեսի ներկայացուցիչների հետ ձեռք բերված պայմանավորվածությունները` օգոստոսի 26-28-ին Հայ Ազգային Կոնգրեսի երիտասարդների ամենամյա ավանդական հավաք կազմակերպելու մասին:
7. Այս բոլոր զարգացումները վկայում են, որ ձևականորեն շարունակելով երկխոսությունը, իշխանությունները, վախենալով Հայ Ազգային Կոնգրեսի աճող հեղինակությունից, նորից անցնում են հին` բռնաճնշումների, ինչպես նաև մարդու իրավունքների և ժողովրդավարական ազատությունների ոտնահարման մարտավարության կիրառմանը:
8. Քաղբանտարկյալների առկայությունը անհնար է դարձնում երկխոսության շարունակությունը:
Նման պայմաններում Հայ Ազգային Կոնգրեսը հարկ է համարում հայատարարել հետևյալը.
Հայ Ազգային Կոնգրեսի պատվիրակությունը առկախում է իր մասնակցությունը Կոնգրես-իշխանություններ երկխոսության շրջանակներում ընթացող բանակցություններում: Կոնգրեսի պատվիրակությունը նաև հայտարարում է, որ պատրաստ է վերսկսելու բանակցությունները Տիգրան Առաքելյանի խափանման միջոցը փոխելուց անմիջապես հետո»:
