Գյումրիի «Ասպարեզ» ժուռնալիստների ակումբի խորհրդի նախագահ Լևոն Բարսեղյանը «Ֆեյսբուքի» իր էջում գրել է.
«Երբ ապօրինի գույքի վերադարձի քննության կցկտուր պատմություններից մեզ հայտնի դարձած հատուկենտ կասկածելի գույքի թվային արտահայտությունը արտածում ենք քննվող ամբողջ ծավալի վրա, ստացվում է առնվազն 6 մլրդ դոլարին համարժեք կասկածելի ունեցվածք։ Մոտարկումս, սխալմունքի մեծության բերումով, շատ անլուրջ է, բայց այլ հնար չկա հաշվելու։ Կասեք՝ ավելի շատ է, արտերկիր տարվածը գրեթե չկա այդ հաշվարկներում. իրավացի եք։
Այդ 6 միլիարդի յուրացումն անմիջական վնասն է։ Փորձեք հաշվել, թե դրա վերարտադրողական ծավալն ինչ կլիներ հիմա, ավելացրեք չստեղծված աշխատատեղերի և դրա շնորհիվ լրացուցիչ ակտիվների ու կապիտալի հանրագումարը։ Ես չեմ պատկերացնում, թե ինչ թիվ կստացվեր, քանի հոգի արտագաղթած չէր լինի, քանի տնտեսություն ու ձեռնարկատիրություն խորտակված չէր լինի, ու ինչքան կաճեր ամբողջ տնտեսությունը։
Տնտեսագետները կարող են երևի հաշվել թե, օրինակ, եթե 25 տարում X կապիտալ չյուրացվեր ու մնար որպես հանրային սեփականություն, հիմա այդ X-ն ինչ թիվ դառած կլիներ, բնակչությունն ինչքան կլիներ, բյուջեն, ՀՆԱ-ն ինչ կլինեին։ Երեք փոքր խումբ տնտեսագետ, ֆինանսիստ, քաղաքագետ ու ծրագրավորող որ նստեն, իրարից անկախ մոտավոր ալգորիթմ գրեն, հաստատ պետք կգա։ Ամեն ապօրինի կապիտալի վերադարձից հետո հանրագումարային թիվը դնեն բանաձևում, հասկանանք՝ իրականում ինչեր ենք կորցրել, ու հասկանանք՝ էս խայտառակ վիճակը որ ունենք՝ կունենայի՞նք, եթե երկիրը չքերեին ու ուտեին։ Գիտությունների ազգային ակադեմիան, օրինակ, էս ստից հարցով չի՞ ուզում զբաղվել։ Դոկտորի կոչում չունե՞ք տալու այն մարդկանց, որոնք այդ հաշիվները կանեն-կդնեն ժողովրդի առաջ, թե՞ լավ է այդպես։ Մի քիչ շոգ է, բայց լավ է»։…