Կիրակի տեղի է ունեցել Ֆրանսիայի խորհրդարանի ընտրության առաջին փուլը, որտեղ նախագահ Մակրոնի «Միասին» դաշինքը ընդամենը 1 տասնորդական տոկոսով է առաջ անցել ձախ ուժերի՝ «Նոր ժողովրդական էկոլոգիական և սոցիալական միություն» կոալիցիայից, որը գլխավորում է Ժան-Լյուկ Մելանշոնը: Նախնական տվյալով Մակրոնի ուժը հավաքել է 25,7, իսկ Մելանշոնինը՝ 25,6 տոկոս ձայն: Երրորդ տեղում է Մարի լե Պենի «Ազգային միասնություն» կուսակցությունը՝ 18,7 տոկոս: Շաբաթներ առաջ Մակրոնը հենց լե Պենի հետ էր պայքարում նախագահի ընտրության երկրորդ փուլում, տանելով վստահ հաղթանակ: Բայց, ամբողջ հարցն այն է, որ նրա վստահ հաղթանակի հիմնական «գրավական» էր հենց փաստը, որ երկրորդ փուլի մրցակիցը Լե Պենն էր: Նույն Մելանշոնը, որին շատ քիչ ձայն չէր բավարարել Լե Պենի փոխարեն երկրորդ փուլ դուրս գալու համար, իր ընտրողներին կոչ էր արել չքվեարկել Լե Պենի դեմ: Ու, թեև նա չէր աջակցել նաև Մակրոնին, սակայն արդեն իսկ չքվեարկելու կոչը ըստ էության անուղղակի աջակցություն էր նրան:Խորհրդարանի ընտրության պարագայում իրավիճակը փաստորեն այլ է և Մակրոնի ուժը ի դեմս Մելանշոնի ունի թերևս բավականին լուրջ մրցակից և խնդիր:Թեմայի շուրջ «Առաջին լրատվական»-ը զրուցել է Ֆրանսիայում ապրող լրագրող, հետազատող Տիգրան Եգավիանի հետ:
Եգավիանի խոսքով՝ Ֆրանսիայի խորհրդարանական ընտրություններին անակնալ ոչինչ չկար․ «Ընտրողների քիչ մասնակցությունը մտահոգիչ է, արմատական կուսակցություններին ուժեղ մասնակցություն ընձեռեց: Արմատական կուսակցությունների ծրագիրը պոպուլիստական է և անիրատեսական: Մակրոնի համար այս ընտրությունը փոքր խաղ էր, նպատակը՝ արմատականներին չեզոքացումն էր: Ֆրանսիայում դասական քաղաքական համակարգը փլվում է, վատառողջ մթնոլորտ է ձևավորվում: Ֆրանսիացիները չեն հավատում այս քաղաքական համակարգին: Ֆրանսիան ինքնության ճգնաժամի մեջ է․միջին դասակարգը տկարացավ:Ֆրանսիան մտնում է անկայուն հունի մեջ»: