Նյու Յորքում տեղակայված համաշխարհային խոշորագույն NYSE և NASDAQ բորսաները մտադիր են բացվել երկուշաբթի օրը, չնայած «Իռեն» անունը կրող փոթորիկին, որը կարող է այս շաբաթվա վերջում լուրջ վնաս հասցնել ԱՄՆ հյուսիսարևելյան ափին:
«Մենք ունենք հատուկ այսպիսի վիճակներում գործելու ծրագիր, որը կարգավորում է բորսայի գործունեությունը և ապահովում է մարդկանց անվտանգությունը», – ասել է NYSE-ի ներկայացուցիչը՝ The Wall Street Journal-ին տված հարցազրույցի ժամանակ:
«NASDAQ-ը պլանավորել է հանգստյան օրերին իրականացնել սարքավորումների մոնիթորինգ և այդ մասին տեղեկացնել բորսայի մասնակիցներին», – մեջբերում է բորսայի կայքը NASDAQ-ի ներկայացուցչին: Արևելյան ափի չորս` Հյուսիսային Կարոլինայի, Նյու Ջերսիի, Վիրջինիայի և Մերիլենդի նահանգապետերը հայտարարել են արտակարգ դրություն՝ «Իռեն» փոթորկի պատճառով. հայտնում է CNN-ը:
Ինչպես հայտնել է Նյու Ջերսիի նահանգապետ Քրիս Քրիստին, փոթորիկը կարող է իր հետ բերել նաև ջրհեղեղներ, որը կլինի «դարի իրադարձություն»: Հյուսիսային Կարոլինայում իրականացվում է տեղի բնակչության տարհանում, թեպետ ավելի վաղ հայտնվում էր միայն զբոսաշրջիկների մասին: Մերիլենդի Օուշեն-Սիթի քաղաքում տարհանումը կսկսվի տեղի ժամանակով կեսգիշերին:
Ներկա փահին փոթորիկն ունի ուժգնության երրորդ աստիճան, սակայն հանգստյան օրերին այն կարող է հասնել չորրորդ աստիճանի: Իր ուժգնությամբ «Իռենը» կարող է համեմատվել «Գլորիա» փոթորկի հետ, որը 1985 թ. անցել էր ԱՄՆ արևելյան ափով. հայտնում է Bloomberg-ը:
Նյու Յորքում տարհանման մասին որոշումը կկայացվի օգոստոսի 26-ին:
