Դեսպանների քաղաքական նշանակումը աշխարհում լայն տարածում գտած պրակտիկա է, Հայաստանի արտաքին գործերի նախարար Արարատ Միրզոյանը Հայաստանի կողմից վերջին նման նշանակումներին անդրադառնալով՝ վստահեցնում է, որ նրանք լավագույն դեսպաններից են:
Միրզոյանն այս մասին ասաց ԱԺ մշտական հանձնաժողովների համատեղ նիստում ՀՀ 2021 թ. պետական բյուջեի կատարման մասին տարեկան հաշվետվության քննարկմանը՝ անդրադառնալով ՔՊ խմբակցության պատգամավոր Հռիփսիմե Գրիգորյանի հարցին:
Պատգամավորը հետաքրքրվեց, թե նախարարն ինչպե՞ս է գնահատում քաղաքական նշանակումները, հատկապես դեսպանների աշխատանքը՝ հիշեցնելով քննադատությունների մասին, որ մի շարք կարևոր երկրներում դեսպանի պաշտոնում քաղաքական նշանակումներ են արել:
«Քաղաքական նշանակումները նախարարի պաշտոնում աշխարհում ընդունված պրակտիկա է: Ամենևին ոչ բոլոր արտաքին գործերի նախարարներն են կարիերային դիվանագետներ: Եվ ընդհանրապես ցանկացած նախարարի պաշտոն քաղաքական պաշտոն է»,-ասաց ԱԳ նախարարը:
Անդրադառնալով դեսպանների քաղաքական նշանակումներին՝ Միրզոյանն ասաց, որ դա ևս աշխարհում լայն տարածում գտած պրակտիկա է: Տարբեր երկրներ քաղաքական նշանակումներ են անում դեսպաների պաշտոններում: «Դա եղել է մինչև 2018 թվականի հեղափոխությունը, եղել է հեղափոխությունից հետո, եղել է մինչև պատերազմը, պատերազմից հետո և վստահաբար կլինի նաև ապագայում: Եթե դուք դեսպանների վերջին մի քանի քաղաքական նշանակումների մասին եք հարցնում, ապա չափազանցրած չեմ լինի, եթե ասեմ, որ մեր լավագույն դեսպաններից են»,-ասաց ԱԳ նախարարը: