Կառավարությունը հայտնում է Հայաստանի վարչապետի և Իրանի նախագահի հեռախոսազրույցի մասին: Ընդ որում, հատկանշական է, որ նույն օրը հայտնի է դառնում նաև Հայաստանի և Վրաստանի վարչապետների հեռախոսազրույցի մասին: Թե Իրանի նախագահի, թե Վրաստանի վարչապետի հետ հեռախոսազրույցների մասին պաշտոնական հաղորդագրություններում նշվում է, որ հաստատվել է մոտակա հանդիպումների, փոխայցերի պատրաստակամություն, ինչը թերևս ոչ միայն խոսակցության այսպես ասած կանոնի կամ արարողակարգի շրջանակում է, այլ վկայում է այն մասին, որ առաջին դեմքերը ունեն խոսակցության առարկայական հարցեր և օրակարգ:
Իրանի և Վրաստանի ղեկավարների հետ Փաշինյանի հեռախոսազրույցները չունենալով իհարկե պատճառահետևանքային կապ, այդուհանդերձ կարող են դիտարկվել բավականին ուշագրավ անուղղակի և խորհրդանշական կապակցվածության տրամաբանությամբ՝ ռեգիոնալ և միջազգային զարգացումների համատեքստում: Արևմուտքի և Ռուսաստանի կոշտ դիմակայության շարունակվող ռեժիմի, պատժամիջոցների, նաև աշխարհատնտեսական և լոգիստիկ վերաձևումների շրջափուլում Կովկասի առնչությամբ թերևս առավել զգայուն են դառնում այն գործոնները, որոնք կարող են ընդհանուր հետաքրքրություն ձևավորել թե Հայաստանի, թե Վրաստանի և թե Իրանի համար: Երեք երկրները թերևս ունեն նվազագույնը երկու հիմնարար շահագրգռություն՝ Կովկասում թույլ չտալ պատերազմ, ինչպես նաև անել առավելագույնը ռեգիոնալ ուժերի բալանսի հավասարակշռություն ապոհովելու համար: Իհարկե այդ գործոնները և հիմնարար շահագրգռությունները ազդվում են մի շարք քաղաքական հանգամանքներով, որոնք նույնական չեն երեք երկրի համար և պահանջում են բավականին բարդ և հետևողական աշխատանք ընդհանուր հետաքրքրությունների եռակողմ կապիտալիզացիայի մակարդակը անհրաժեշտ նվազագույնի հասցնելու համար: Ավելին, անկասկած է, որ Իրանի քաղաքական «քաշային կատեգորիան» անհամեմատ ավելի բարձր աստիճանի վրա է, քան Հայաստանն ու Վրաստանը: Միևնույն ժամանակ սակայն, իրադրությունը պահանջում է թերևս «կոմբինացված» մոտեցումներ և այդ առումով Երևանն այստեղ կարող է լինել «քաղաքական կամուրջ», որը հնարավորություն կտա կոմունիկացնել թե իրանյան, թե վրացական քաղաքական ներուժը և առավելագույնս հարմար միջավայր ստեղծել համադրելի գործոնները մեկտեղելու և առավելագույնը ստանալու համար:
