Բրյուսելում տեղի ունեցած Փաշինյան-Միշել-Ալիև հանդիպումից հետո Մոսկվայից Երևան և Բաքու է զանգահարել ՌԴ արտգործնախարար Լավրովը, իսկ Վաշինգտոնից Երևան է զանգահարել ԱՄՆ պետքարտուղար Էնթոնի Բլինքենը: Մոսկվայից և Վաշինգտոնից «հեռախոսային» արձագանքները բավականին հետաքրքիր են և առաջացնում են որոշակի դիտարկումների առիթ: Թեմայի շուրջ «Առաջին լրատվական»-ը զրուցել է քաղաքագետ Գուրգեն Սիմոնյանի հետ:
Քաղաքագետը արցախյան հիմնախնդրի կարգավորման ուղղությամբ ակնկալիքներ չունի․ «Արցախյան հիմնախնդիրը չպետք է դիտարկել մեկ կոմպոնենտով: Արցախյան հիմնախնդիրը բովանդակային փոփոխություն է կրում: Բրյուսելյան ու մոսկովյան ձևաչափի «պարանը» կարող է կտրվել․ քաղաքական կամք է պետք դրսևորել: Գնդակը մեր դաշտում է, խաղաղասերի առաջնորդությունը կարող ենք մենք ստանձնել»:
Անդրադառնալով ներքաղաքական իրավիճակին, քաղաքագետը նկատեց․ «Ընդդիմությանը չսատարելը չի նշանակում, որ հասարակությունը գոհ է այս իշխանությունից: Միգուցե քաղաքական հայտարարություն հնչեր, որ ներկայիս կառավարությունը ճգնաժամային է: Իշխանությունից համարձակ քայլ է պետք, որը կհանգեցնի ներքաղաքական համերաշխության»: