Ադրբեջանի արտգործնախարար Ջեյհուն Բայրամովն, անդրադառնալով հայ-ադրբեջանական սահմանագծման ու սահմանազատման հանձնաժողովի աշխատանքներին ասել է, որ Բաքուն արդեն համաձայնեցրել է Ադրբեջանի փոխվարչապետի թեկնածությունը Երևանի հետ։ «Ներկայումս կողմերը պայմանավորվածություն ունեն հանձնաժողովի կազմի շուրջ»,- հայտնել է Բայրամովը։
Բայրամովը նաև նշել է, որ հանձնաժողովի առաջին հանդիպումը նախատեսվում էր անցկացնել մինչև ապրիլի վերջ. «Կարող եմ նշել, որ մինչ հանդիպումը երկու հեռախոսազրույց է կայացել իմ և Հայաստանի ԱԳ նախարարի միջև, որոնց ընթացքում Ադրբեջանը ներկայացրել է իր առաջարկները՝ կապված հանձնաժողովի կազմի հետ։ Ադրբեջանի առաջարկն այն էր, որ հանձնաժողովը պետք է կազմակերպվի այլ ձևաչափով, այսինքն՝ անձը, ով ղեկավարելու է հանձնաժողովը, լինի վարչապետի մակարդակով։ Անգամ առաջին հեռախոսազրույցի ժամանակ Հայաստանի արտգործնախարարը դա ըմբռնումով ընդունեց՝ ասելով, որ այս առաջարկը Հայաստանում քննարկելու համար ավելի շատ ժամանակ է պետք։ Այնուհետև հայկական կողմը հայտարարեց, որ այս առաջարկն իրենց համար ընդունելի է։ Կողմերի միջև հանձնաժողովի կազմի վերաբերյալ կա պայմանավորվածություն։ Ադրբեջանական կողմն արդեն պատրաստ էր այս հանդիպումն անցկացնել ապրիլին։ Այն բանից հետո, երբ հայկական կողմը կավարտի իր ընթացակարգերը, հանդիպումը կարող է կայանալ»,- հավելել է Բայրամովը։