Գերմանիայի նախարարների կաբինետն առաջարկել է սպասել մինչև Բեռլինի ոստիկանության հետաքննության ավարտը շենքերի համալիրի վրա ենթադրյալ հարձակման գործով, որտեղ ի թիվս այլոց, բնակվում են նաև ռուս լրագրողներ։ Այս մասին գրել է ՏԱՍՍ-ը՝ վկայակոչելով Նախարարների կաբինետի ներկայացուցիչ Վոլֆգանգ Բյուխների հայտարարությանը։
Վերջինիս խոսքով միջադեպի մանրամասների համար պետք է կապ հաստատել Բեռլինի արդարադատության մարմինների հետ կամ սպասել նրանց եզրակացություններին։ «Սակայն իշխանության տեսակետից պարզ է, որ մենք չենք ընդունում բռնությունը, բոլորն ունեն անվտանգության իրավունք»,- ասել է նա։
Գերմանիայի ՆԳՆ մամուլի ծառայության ներկայացուցիչը նույնպես այս հարցի վերաբերյալ հավելյալ տեղեկություն չի հաղորդել։
Մայիսի 7-ին Գերմանիայում ՌԴ դեսպանատունը հայտարարել է Ռուսաստանի Դաշնությանը պատկանող բնակելի համալիրում բնակվող ռուս լրագրողների դեմ «ահաբեկչական գործողության հավանական փորձը» կանխելու մասին։ Շենքերի այս համալիրը գտնվում է Շտեգլից թաղամասում, որտեղ, ի թիվս այլոց, ապրում են «ՌԻԱ Նովոստի»-ի աշխատակիցները։
Մայիսի 7-ին փողոցից նետված շշից կոտրվել է տան բնակարաններից մեկի պատուհանը։ Տեղի հետագա զննությամբ հայտնաբերվել է կասկածելի առարկա՝ լցված հեղուկով։