Հայկական մամուլում լուրեր են շրջանառվում, թե Վրաստանն ու Հայաստանը ներդրումների պահպանման և խրախուսման մասին համաձայնագիր են ստորագրել: Տեղական կայքերն այդ լուրը փոխառել են «Բիզնես-Գրուզիա» կայքից:
ՀՀ էկոնոմիկայի նախարարության տեղեկատվության բաժնից «Առաջին լրատվական»-ին հայտնեցին, որ վերջերս ՀՀ-ն և Վրաստանը ներդրումներին առնչվող համաձայնագիր չեն ստորագրել: Նման համաձայնագիր ստորագրվել է 1996 թվականին, և դա սովորական փաստաթուղթ է, որ կնքվում է յուրաքանչյուր պետության հետ, որի հետ տնտեսական շփումներ կան:
«Վերջին շրջանում ներդրումների խրախուսման մասին ոչ մի նոր համաձայնագիր չի կնքվել»,- հավաստեցին նախարարության տեղեկատվության բաժնից:
Նշենք, որ համաձայնագիրն ուժի մեջ է 10 տարի, սակայն ժամկետը լրանալուն պես այն կշարունակի մնալ ուժի մեջ, քանի դեռ կողմերից մեկը 12 ամսվա ընթացքում գրավոր չհայտնի երկրորդ կողմին համաձայնագիրը դադարեցնելու մասին:
Հաշվի առնելով ներկայիս իրողությունները, որ Վրաստանում հարկային դաշտը գործարարության համար շատ ավելի բարենպաստ է, քան Հայաստանում, և հայկական բիզնեսը սկսել է հոսել Վրաստան, այս համաձայնագիրն այսօր առավել հետաքրքրական է դառնում: Գործատուների հանրապետական միության նախագահ Գագիկ Մակարյանը մեզ հետ զրույցում նշեց, որ այդ համաձայնագիրն այսօր աշխատում է Վրաստանի օգտին:
Նա փաստեց, որ առանց այդ համաձայնագրի էլ հայկական բիզնեսը Վրաստան տեղափոխվելու միտում ունի: Գ.Մակարյանի կարծիքով՝ այդ համաձայնագրով ավելի պաշտոնական ձև է տրվում դեպի այդ երկիրն ուղղված ներդրումներին կամ գործարարության զարգացման միտումներին: Ընդ որում՝ դեպի Վրաստան բիզնեսի հոսք կա ոչ միայն Հայաստանից, այլև այլ երկրներից ևս:
«Դրա համար մենք պետք է հետ չընկնենք, այլ այսպես ասած՝ թասիբի ընկած, ավելի արագացնենք ու ընդլայնենք կատարվող բարեփոխումները»,- նշեց Գ. Մակարյանը:
