Հայաստաննի անվտանգության խորհրդի քարտուղար Արմեն Գրիգորյանը ապրիլի 26-ին աշխատանքային այց կկատարի Մեծ Բրիտանիա, ինչպես հայտնում է ԱԽ գրասենյակը: Օրեր առաջ Արմեն Գրիգորյանը այցելել էր Լեհաստան, իսկ շաբաթներ առաջ էլ նա այց էր կատարել Գերմանիա: Այդ ընթացքում, եղավ նաև նրա այցը Ռուսաստան՝ վարչապետ Փաշինյանի պաշտոնական այցի շրջանակում, երբ ՌԴ ԱԽ քարտուղարի հետ ստորագրվեց նաև տեղեկատվական անվտանգության մասին համաձայնագիրը: Ինչպես հայտնի է, Փաշինյանի մոսկովյան այցի ընթացքում ստորագրվեց նաև հայ-ռուսական բարձր մակարդակի համատեղ հայտարարությունը:
Երևանը վերջին շաբաթներին վարում է բավականին ակտիվ դիվանագիտական հաղորդակցություն մի շարք ուղղություններով: Եթե Մոսկվային և արևմտյան ուղղություններին ավելացնենք նաև արտգործնախարար Արարատ Միրզոյանի հեռախոսազրույցը Չինաստանի արտգործնախարարի հետ, ինչպես նաև այցը Հնդկաստան, որտեղ նա ապրիլի 25-ին հանդիպել է այդ երկրի արտաքին գործերի նախարարին, ապա կարող ենք արձանագրել երևանյան դիվանագիտական շփումների բավականին լայն դիապազոն և բավականին ինտենսիվ ժամանակացույց: Ինչի՞ մասին է վկայում դիապազոնն ու ինտենսիվությունը: Այն արտացոլում է բարդությունն ու մարտահրավերների ուժգնությու՞նը, թե Երևանը փորձում է առավելագույնն անել նոր աշխարհակարգի համար համաշխարհային պայքարի թեժ շրջանում հնարավոր առանցքային խաղացողների հետ հարաբերության և աշխատանքի առավելագույնս առարկայական աշխատանքի համար, հնարավոր շրջադարձերին պատրաստ լինելու համար: Հավանական է՝ թե մեկը, թե մյուսը:
Բանն այն է, որ աշխարհակարգային գործընթացներն այդ իմաստով աչքի են ընկնում անկանխատեսելիությամբ, հետևաբար բավականին բարդ է կանխատեսել կամ կանխորոշել աշխատանքի հիմնական ուղղությունը, և ըստ այդմ չի մնում այլընտրանք, քան կարողանալ ապահովել օպտիմալ տարածություն հիմնական խաղացողների շրջանակի հանդեպ: Հասկանալի է, որ այդ տարածությունը չի կարող բոլորի դեպքում լինել նույնական, սակայն այստեղ հարցն իհարկե թվաբանությունը չէ, մաթեմատիկական չափումը չէ, այլ յուրաքանչյուր ուղղությամբ հնարավոր ռացիոնալ, իրատեսական օրակարգի ձևավորումը և գլխավորը՝ այդ ուղղություններով ձևավորվող կամ մշակվող, դիտարկվող օրակարգերը համադրության սկզբունքի հիմքով մշակելը և աշխատանքը դրա վրա կառուցելը, քանի որ օրակարգերի հակադրությունը կարող է հանգեցնել ոչ միայն լոկ անարդյունավետության, այլ բավականին լուրջ վտանգների:
