1920-ականի քարտեզներն ի վնաս Ադրբեջանի են, բայց Մոսկվային որոշել է թույլ Հայաստանին վնասել; «Առաջին լրատվական»-ի հետ զրույցում նման տեսակետ հայտնեց քարտեզագետ և աշխարհագրագետ Ռուբեն Գալիչյանը:
«Կա երկու քարտեզ, մեկը, որ 1920-ական թվականների քարտեզն է, երբ մեր հողերը դեռ չէին տրվել Ադրբեջանին, և դեռևս անկլավներ չկային, դրանք բոլորը Հայաստանի տարածքում էին, իսկ հետո, արդեն 1930-ականներից հետո աստիճանաբար քարտեզը փոխվեց, դարձավ այն, ինչը կար Խորհրդային Հայաստանի զինվորական շտաբի մոտ: Շուրջ 1500 քառակուսի կիլոմետր տարածքներ տրվել են Ադրբեջանին Կարմիր Քրդստանի ստեղծման պատրվակով: Կարմիր Քրդստանը չստեղծվեց, բայց հողերը մեզ չվերադարձվեցին: Բացի այդ, անկլավներ տրվեցին Ադրբեջանին: Վերջինը Ադրբեջանին է տրվել Տիգրանաշենի անկլավը, դա եղել է 1940 թվականին: Դրանք Խորհրդային քարտեզների մեջ արդեն ադրբեջանական տարածքներ են: Դա մեզ համար ոչ մի կերպ ընդունելի չէ: Մենք պետք է փոխանակենք, մեր անկլավները մենք վերցնենք, իրենց մոտ եղած անկլավներն իրենք վերցնեն: Դրանք գրեթե հավասար չափերի են»-ներկայացրեց Գալիչյանը:
