Մայիսի 16-ից Արցախում կգործեն գազի ավելի բարձր սակագներ։ Նախօրեին Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի նիստում բավարարվել է «Արցախգազ» փակ բաժնետիրական ընկերության՝ սպառողներին վաճառվող բնական գազի սակագների վերանայման հայտը: Սահմանվել են «Արցախգազ» փակ բաժնետիրական ընկերության կողմից սպառողներին վաճառվող բնական գազի հետևյալ սակագները՝ ամսական մինչև 10 000 խմ վաճառվող բնական գազի համար` 143 700 դրամ/հազար խմ (ներառյալ ԱԱՀ-ն)` աճը կազմում է 4.7 դրամ 1 խմ համար կամ 3.4%, 10 000 խորանարդ մետրը գերազանցող բնական գազի համար` 265.81 ԱՄՆ դոլարին համարժեք դրամ` սպառված յուրաքանչյուր հազար խմ բնական գազի համար (ներառյալ ԱԱՀ-ն)՝ աճը կազմում է 3.9%, գյուղատնտեսության ոլորտում գործունեություն իրականացնող ջերմոցային տնտեսություններին վաճառվող բնական գազի սակագինը սահմանվել է`նոյեմբերի 1-ից մինչև մարտի 31-ը ներառյալ ժամանակահատվածի համար՝ 233.9 ԱՄՆ դոլարին համարժեք դրամ` սպառված յուրաքանչյուր հազար խմ բնական գազի համար (ներառյալ ԱԱՀ-ն)՝ աճը կազմում է 4.4%, ապրիլի 1-ից մինչև հոկտեմբերի 31-ը ներառյալ ժամանակահատվածի համար՝ ամսական մինչև 10 000 խորանարդ մետր բնական գազի համար՝ 143 700 դրամ/հազար խմ (ներառյալ ԱԱՀ-ն)` աճը կազմում է 4.7 դրամ 1 խմ համար կամ 3.4%, ապրիլի 1-ից մինչև հոկտեմբերի 31-ը ներառյալ ժամանակահատվածի համար՝ ամսական 1 0 000 խորանարդ մետրը գերազանցող բնական գազի համար՝ 265.81 ԱՄՆ դոլարին համարժեք դրամ` սպառված յուրաքանչյուր հազար խմ բնական գազի համար (ներառյալ ԱԱՀ-ն)՝ աճը կազմում է 3.9%: Գյուղատնտեսության ոլորտում գործունեություն իրականացնող վերամշակող կազմակերպություններին վաճառվող բնական գազի սակագինը` 233.9 ԱՄՆ դոլարին համարժեք դրամ` սպառված յուրաքանչյուր հազար խմ բնական գազի համար (ներառյալ ԱԱՀ-ն)՝ աճը կազմում է 4.4%:
Սա, ըստ էության, նույն սակագներն են, որոնք գործուն են Հայաստանում ապրիլի 1-ից:
Այս առնչությամբ, Արցախի Ազգային ժողովի «Ազատ հայրենիք-ՔԴՄ» խմբակցության ղեկավար Արթուր Հարությունյանը «Առաջին լրատվական»-ի հետ զրույցում նշեց, որ Ազգային ժողովում այս թեմայի շուրջ քննարկում նախատեսված չէ, սակայն անհրաժեշտության դեպքում իհարկե, կքննարկեն, այդ թվում դրա հիմնավորումները՝ հասկանալու համար՝ դա պետք է, թե ոչ:
«Անակնկալ չէր այս թանկացումը: Իհարկե, ենթադրվում էր, որ կթանկանա գազը, որովհետև մենք գազը ստանում ենք Հայաստանից, հետևաբար, Հայաստանում սակագնի փոփոխությունը պետք է հանգեցներ Արցախում ևս սակագնի փոփոխության»,-ասաց Հարությունյանը:
Հարցին, թե արդյոք հանրության շրջանում չկան դժգոհություններ գազի թանկացման հետ կապված, Արթուր Հարությունյանը պատասխանեց. «Այս պահին դեռ հանրության շրջանում դժգոհություններ, անհանգստություններ չկան: Այս պահին մենք հանրությանը մտահոգող ավելի կարևոր հարցեր ունենք, քան գազի սակագինը՝ անվտանգային խնդիրներ, Արցախի կարգավիճակի հարց: Եթե սոցիալական լուրջ խնդիր առաջանա, հնարավոր է նաև քննարկումներ լինեն որոշակի խմբերի համար գազի սակագնի սուբսիդավորման հնարավորության վերաբերյալ»:
Նույն խնդրի վերաբերյալ Արցախի ԱԺ Սոցիալական և առողջապահության հարցերի մշտական հանձնաժողովի անդամ Նունե Մելքումյանը «Առաջին լրատվական»-ին ասաց, որ իրենց հանձնաժողովում դեռ չեն քննարկել հարցը. «Շաբաթվա ընթացքում կքննարկենք ավելի կոնկրետ դիրքորոշում կունենանք: Քննարկման վերաբերյալ չենք պայմանավորվել, բայց, իհարկե, կքննարկենք, ո՞նց կարող է չքննարկենք: Դրա արդյունքում էլ կունենանք պարզ, կոնկրետ տեսակետ, որն էլ կհայտնենք»:
