Hye Tert-ի (Հայ Թերթ) փոխանցմամբ՝ Թուրքիայի արևմտյան հատվածում գտնվող Իզմիրի նահանգի Չեշմե շրջանում վերանորոգվել է Թուրքիայի Հանրապետության հիմնադիր Մուսթաֆա Քեմալ Աթաթուրքի կողմից մզկիթի վերածված հունական եկեղեցին, որն այսուհետ կգործի իր նախկին նշանակությամբ։
1874 թվականին կառուցված Այիոս Կոստանդինոս եկեղեցին Աթաթուրքի «շնորհիվ» վերածվել էր Փազարյերի մզկիթի։ Եկեղեցու վերանորոգման աշխատանքները մեկնարկել են 2009 թվականի սեպտեմբերին, սակայն Թուրքիայի հունական համայնքը դժգոհ էր մնացել այդ աշխատանքների ընթացքից։
Նա պահանջել էր վերականգնել մարմարյա սյուները, զարդաքանդակներն ու սրբապատկերները, որոնք կորստյան են մատնվել եկեղեցու՝ որպես մզկիթ գործելու ժամանակաշրջանում։ Հունական համայնքի այդ պահանջը բավարարվել է, և եկեղեցին այլևս մզկիթ չի հիշեցնում։
Փաստորեն, սրանով Թուրքիայի ներկայիս վարչապետ Էրդողանի գլխավորած «չափավոր իսլամիստները» հերթական հարվածն են հասցնում Թուրքիայի աշխարհիկ պետական ռեժիմը կանխորոշած Աթաթուրքի թողած ժառանգությանը։
