«Քադաֆիին չի հաջողվի երկար ժամանակ դիմադրել արտաքին միջամտությանը»,- այսօր լրագրողների հետ հանդիպման ժամանակ նման տեսակետ հայտնեց Ցեղասպանության ինստիտուտ-թանգարանի փոխտնօրեն, արաբագետ Սուրեն Մանուկյանը` խոսելով Տրիպոլիի անկման և տարածաշրջանում դրա հնարավոր հետևանքների մասին, մասնավորապես Սիրիայում:
Արաբագետն ընդգծեց մի կարևոր գործոն` տեղեկատվական պատերազմ, որը խանգարում է ճիշտ ընկալել Լիբիայի ներկայիս իրավիճակը. «Մենք պետք է հասկանանք, որ տեղեկատվության ճշմարտացիության հարցում համոզված չենք կարող լինել, քանի որ Լիբիայից մեզ տեղեկատվություն է հասնում երկու լրատվամիջոցով` Al Jazeera հեռուստատեսությամբ և կոալիցիայի կողմից ստեղծված լրագրողների խմբի միջոցով: Լիբիայում չկա նաև ինտերնետային ծառայություն, այդ պատճառով ամեն օր հեռուստատեսությամբ տեսնում ենք նույն կադրերը»,- մեկնաբանեց Ս. Մանուկյանը` օրինակ բերելով երկու օր առաջ տարածված Քադաֆիի տղաների ձերբակալության տեղեկությունը, սակայն երեկ պարզ դարձավ, որ նրանք հեռուստատեսությամբ են ելույթ ունենում: Այնուամենայնիվ, արաբագետը համոզված է այն փաստի իրավացիության հարցում, ըստ որի` Տրիպոլին այլևս Քադաֆիի ձեռքում չէ.
«Այս արաբական ապստամբության պատմության մեջ Լիբիան նախորդներից տարբերվեց երկու գործոնով: Առաջինն այն է, որ, ի տարբերություն Թունիսի և Եգիպտոսի, Լիբիայի իշխանությունը դիմադրեց ընդդիմությանը, իսկ երկրորդն այն է, որ այստեղ եղավ արտաքին միջամտություն»,-նշեց Ս. Մանուկյանը` տեղեկացնելով, որ Քադաֆիի ձեռքում են մնացել Լիբիայի երկու խոշոր կենտրոններ, որոնք, նրա կարծիքով, չեն մնա նրա տիրապետության ներքո երկար ժամանակ:
Անդրադառնալով հնարավոր հետևանքներին` արաբագետը նշեց, որ Լիբիայի հաջողված փորձը կարող է տեղափոխվել Սիրիա. « Լիբիական ռեժիմի կրկնությունը Սիրիայում աղետալի հետևանքներ կարող է ունենալ նաև Հայաստանի և հայերի համար, քանի որ Սիրիայում ապրում է մոտավորապես հարյուր հազար հայ»,- կանխատեսեց Ս. Մանուկյանը:
