Թուրքական Milliyet թերթի փոխանցմամբ՝ Իրանի հատուկ ծառայությունների կողմից Թուրքիայում ահաբեկչական հռչակված ու արգելված «Քրդստանի աշխատավորական կուսակցության» (PKK) երկրորդ դեմք Մուրադ Քարայըլանի ձերբակալության մասին դեռ կոնկրետ տեղեկություններ չկան։ Վերջինս 1999 թվականին PKK հիմնադիր Աբդուլլահ Օջալանի ձերբակալությունից հետո դարձել է PKK-ի փաստացի ղեկավարը։
Թուրքիայի փոխվարչապետ Բյուլենթ Արընչը հայտարարել է, որ այս միջադեպի հետ կապված ինչ-որ բան կա, սակայն դեռ չի կարող բարձրաձայնել այդ մասին։ Իսկ Kanal D-ն նշում է, որ PKK-ն արդեն նոր փաստացի ղեկավար ունի։ Խոսքը «Բահոզ Էրդալ» ծածկանունով Ֆեհման Հուսեյնի մասին է, ով փոխարինել է Քարայըլանին։
Թուրքական թերթն ուշադրություն է հրավիրում երկու օր առաջ Թուրքիայի վարչապետ Էրդողանի ու Իրանի նախագահ Ահմադինեժադի միջև տեղի ունեցած 34 րոպեանոց անսպասելի հեռախոսազրույցի վրա, որում նրանք քննարկել են Քարայըլանի ձերբակալության հարցը։
Հիշեցնենք, որ փորձագետների կարծիքով՝ Իրանը կարող է Քարայըլանի ձերբակալության խաղաքարտն օգտագործել Թուրքիայի դեմ՝ Սիրիայի հարցում նրան զսպելու համար։