Հայաստանի արտգործնախարար Արարատ Միրզոյանն երեկ ընդունել է ԵԱՀԿ Մինսկի խմբի Ֆրանսիայի համանախագահ Բրիս Ռոքֆոյին:
Մարտի վերջին, հիշեցնենք, Հայաստան էր ժամանել նաև ԵԱՀԿ Մինսկի խմբի ռուսաստանցի համանախագահ Իգոր Խովաևը։ Միրզոյանը նրա հետ քննարկել էր Փառուխի հատվածում ստեղծված իրավիճակը, ներկայացրել նաև հայկական կողմի դիրքորոշումը ԵԱՀԿ Մինսկի խմբի համանախագահության շրջանակներում խաղաղության պայմանագրի շուրջ Հայաստանի և Ադրբեջանի միջև բանակցություններ սկսելու վերաբերյալ, վերահաստատել ԵԱՀԿ ՄԽ համանախագահության լիարժեք աշխատանքների կարևորությունը։
Արդեն ապրիլի 8-ին Հայաստանի արտաքին գերատեսչության ղեկավարը Մոսկվայում էր։ Հայաստանցի իր պաշտոնակցի հետ հանդիպմանը հաջորդած մամուլի ասուլիսում Լավրովը հայտարարեց, որ Ֆրանսիան ու Միացյալ Նահանգները հրաժարվել են համագործակցել Ռուսաստանի հետ՝ Մինսկի խմբի եռյակում։ Սերգեյ Լավրովը պնդեց, թե Արևմուտքը վեր է դասել Ռուսաստանի հետ տարաձայնությունները ղարաբաղյան խնդրի կարգավորումից։ Հայաստանի արտգործնախարարը, մինչդեռ, չկիսեց Լավրովի գնահատականն ու պնդեց, թե միջազգային համայնքը շարունակում է ղարաբաղյան խնդրի կարգավորումը տեսնել Մինսկի խմբի ձևաչափով։
Քաղաքական մեկնաբան Հակոբ Բադալյանը չի համարում, որ ֆրանսիացի համանախագահի այցը պայմանավորված է Լավրովի՝ Մինսկի խմբի վերաբերյալ հայտարարությամբ․«Դա ամենևին առաջին առանձին այցը չէ, որ այս ընթացքում տեղի է ունենում։ Բնականաբար սա Ֆրանսիայի քաղաքականության շրջանակներում տեղավորվող այց է, որն ակնհայտորեն մեծ ուշադրության արժանացավ հենց Լավրովի հայտարարությունից հետո»,-«Առաջին լրատվական»-ի հետ զրույցում ասաց նա։
Ըստ Բադալյանի՝ այցը խոշոր հաշվով վերահաստատում է Լավրովի արած հայտարարությունը․«Այն իմաստով, որ Ֆրանսիան ու ՄԱՆ-ն հրաժարվում են համանախագահության ձևաչափում աշխատել Ռուսաստանի հետ։Մենք տեսնում ենք, որ վերջին շրջանում տեղի են ունենում առանձին այցեր։ Նախորդ տարի աշնանը Միացյալ Նահանգների համանախագահն էր այցելել։ Այսինքն՝ մենք տեսնում ենք իսկապես, որ կա առանձին համանախագահների աշխատանք, բայց տևական ժամանակ է չկան միասնական շփումներ։ Այս իմաստով հարց է առաջանում՝ ինչի կարող են հասնել համանախագահները առանձին-առանձին աշխատանքով։Մեկը մյուսին առնվազն կարող են խանգարել և <<խանգարել էֆեկտիվորեն»։ Այս տեսանկյունից, թե ինչ հարցերի պատասխան կտա ֆրանսիացի համանախագահի այցը, պետք է տեսնել այցի արդյունքներով, հայտարարություններով և թե արդյոք կշոշափվի Լավրովի հայտարարությունը, ֆրանսիացի համանախագահը կպատասխանի՞ այդ հայտարարությանը»,-ընդգծեց մեր զրուցակիցը։
Քաղաքագետ Լևոն Շիրինյանը դրական է համարում ֆրանսիացի համանախագահի այցը Հայաստան։ Շիրինյանն «Առաջին լրատվական»-ի հետ զրույցում ասաց՝ արևմուտքը կատարում է իր պարտականությունները, այլ խնդիր են Մոսկվայից եկող հայտարարությունները. «Լավրովը հայ ժողովրդի նյարդերի հետ է խաղում, Արցախում իրենց զորքը խաղաղապահի տեսքով է մտել, հիմա իրենց մորթես դուրս չեն գա։ Իրենք այդ պատերազմը կազմակերպեցին, որ մտնեն Արցախ։ Հիմա էլ ուզում են, որ արևմուտքը չմասնակցի աշխատանքներին, ու հարցը մնա իրենց քմահաճույքի շրջանակներում»,-«Առաջին լրատվական»-ի հետ զրույցում ասաց նա։
Շիրինյանի խոսքերով՝ այն, ինչ ձեռնտու է Լավրովին, ձեռնտու չէ հայ ժողովրդին առհասարակ․«Իրենք պարտավոր են աշխատել Մնսկի խմբի շրջանակներում։ Եվ ընդհանրապես ՝ բավական է Լավրովը հայ ժողովրդի շահերը մեկնաբանի, ինքը չի կարող Հայաստանի շահը մեկնաբանել»,-եզրափակեց քաղաքագետը։