Ադրբեջանական սադրանքներին զուգահեռ Թուրքիան շարունակում է խոսել հայ-թուրքական հարաբերությունների կարգավորման մասին: Այս անգամ Թուրքիայի արտգործնախարարի շուրթերով: Մևլյութ Չավուշօղլուն նշել է, որ գործընթացում «լավ դինամիկա է նկատվում»: Վստահության բարձրացմանն ուղղված քայլերն ակնառու են` բանագնացների հանդիպումներ, թռիչքների մեկնարկ, առևտրի բնագավառում որոշ քայլեր: Իսկ ճանապարհների և երկաթուղիների գործարկման հետ կապված երկու կողմն էլ անելիքներ ունի», – ասել է Չավուշօղլուն, հավելելով, որ բանագնացների աշխատանքին զուգահեռ քաղաքական շփումներ ևս կան՝ հիշեցնելով Անթալիայի դիվանագիտական ֆորումում Արարատ Միրզոյանի հետ իր հանդիպումը: Հարցին, թե ինչպե՞ս կգնահատի վերջին շրջանում հայ-ադրբեջանական լարվածությունը, Էրդողանը պատասխանել է, որ Ադրբեջանը ամբողջությամբ պահպանում է եռակողմ հայտարարության դրույթները: Այդ պատճառով Ադրբեջանի կողմից հրադադարի խախտման մասին խոսք չի կարող լինել: Տարածաշրջանում Թուրքիայի աճող դերի, հայ-թուրքական հարաբերություններում տեղի ունեցող գործընթացների և հարակից թեմաների մասին «Առաջին լրատվական»-ը զրուցել է թուրքագետ Անդրանիկ Իսպիրյանի հետ:
Թուրքագետի խոսքով՝ Չավուշօղլուն վաղուց կա հայ-թուրքական հարաբերությունների կարգավորման գործընթացում: Իսպիրյանի դիտարկմամբ՝ Չավուշօղլուն երկու մեսիջ է հղել․ «Փորձում են հայ-թուրքական գործընթացում ներգրավվել երրորդ կողմին՝ Ադրբեջանին Թուրքիան արցախյան հարցի գերին է դարձել: Վտանգը դեռ կա, որ հայ-թուրքական գործընթացը կարող է կանգնել Ադրբեջանի պատճառով»: