Ռուսաստանցի միլիարդատեր Ռոման Աբրամովիչը մասնակցում է Ստամբուլում մեկնարկած ռուս-ուկրաինական բանակցությանը, որի բացմանը ողջույնի խոսք է ասել Թուրքիայի նախագահ Էրդողանը: Ավելին, Աբրամովիչը բանակցության մեկնարկին անգամ խոսել է Էրդողանի հետ: Էրդողանի խոսնակ Իբրահիմ Քալընը ի պատասխան լրատվամիջոցների՝ ասել է, որ Աբրամովիչը ռուսական բանակցող պատվիրակության անդամ է: Ըստ Քալընի, Աբրամովիչին բանակցող է նշանակել ՌԴ նախագահ Պուտինը:
Հիշեցնենք, որ Ուկրաինայի նախագահ Զելենսկին էլ օրեր առաջ խնդրել էր Արևմուտքի երկրներին պատժամիջոց չկիրառել Աբրամովիչի նկատմամբ, քանի որ նա միջնորդ է Ռուսաստանի և Ուկրաինայի միջև: Սա աննախադեպ իրավիճակ է: Աշխարհաքաղաքական, դիվանագիտական բարդ գործընթացներում բանակցողի պաշտոնական կարգավիճակով ներգրավված է ռուսաստանցի միլիարդատերը, որը բիզնեսմեն է, տարիներ շարունակ ապրում էր Լոնդոնում: Կա՞ նման նախադեպ, երբ աշխարհակարգային նշանակության գործընթացներում ներգրավված է բանակցող գործարար միլիարդատերը: Ըստ մամուլի, մարտին Աբրամովիչը այցելել է Լվով և Կիև, հանդիպում ունեցել նաև Ուկրաինայի նախագահ Զելենսկու հետ:
Ուկրաինայի դեմ ռուսական ռազմարշավի մեկնարկից ի վեր շատերն էին մատնացույց անում ռազմական գործողություններին զուգահեռ ծավալվող տարօրինակությունները: Օրինակ, երբ ուկրաինական որևէ քաղաք վերահսկողության տակ է վերցրել ռուսական զինուժը, միաժամանակ քաղաքում շրջում են քաղաքացիներ՝ ռուս զինվորների կողքով, անգամ բողոքի ակցիա անում «օկուպանտների» դեմ: Եվ մի շարք այլ տարօրինակ պատկերներ՝ պատերազմի համար տարօրինակ պատկերներ, իհարկե պատերազմի սարսափելի «օրինաչափ» պատկերներին, աղետին ու ավերին զուգահեռ: Այժմ էլ ահա բանակցային որոշակի տարօրինակություն՝ ՌԴ նախագահը լիազորում է միլիարդատեր գործարարին լինել միջնորդ, դա ընդունում է Ուկրաինայի նախագահը, նաև քաղաքական միջնորդ Թուրքիայի նախագահը: Ի՞նչն է պատճառը, որ Ռոման Աբրամովիչը ստացել է այդ կարգավիճակը: Ռուսաստանը չունի՞ դիվանագետներ: Մի՞թե Աբրամովիչը ի ծնե դիվանագիտական հանճար է: Թե՞ այդուհանդերձ, պատերազմի ու քաղաքականության հարցերին զուգահեռ, տեղի են ունենում քննարկումներ կապված նաև միլիարդավոր դոլարների հետ, ինչի պատճառով էլ տարիներ շարունակ Լոնդոնում բնակված, հրեական ծագումով ռուսաստանցի միլիարդատերը Ստամբուլում մասնակցում է ռուս-ուկրաինական բանակցությանը: Իսկ ի՞նչ միլիարդներ կարող են լինել այդ բանակցության սեղանին:
