Երեկ Երևանի ընդհանուր իրավասության դատարանում Ռոբերտ Քոչարյանը հայտարարեց, որ ոչ միայն իրեն մեղավոր չի ճանաչում, այլև մեղադրանքը համարում է անհեթեթ և իրականության հետ առնչություն չունեցող։
Հիշեցնենք, որ Սիլվա Համբարձումյանի գործով որպես մեղադրյալ ներգրավված են Ռոբերտ Քոչարյանը և նախկին փոխվարչապետ Արմեն Գևորգյանը: Նրանք երկուսն էլ մեղադրվում են գործարար Սիլվա Համբարձումյանի կողմից կաշառք տալու մասին ցուցմունքների հիման վրա:
Հիշեցնենք, որ դատարանում հրապարակվել է մեղադրական ճառի եզրափակիչ մասը, ըստ որի՝ ՀՀ երկրորդ նախագահ Ռոբերտ Քոչարյանին մեղսագրվում է ՀՀ Քրեական օրենսգրքի 311 հոդվածի մաս 4 կետ 2-ով նախատեսված արարքը, իսկ ՀՀ նախկին փոխվարչապետ Արմեն Գևորգյանին՝ Քրեական օրենսգրքի 311 հոդվածի մաս 4 կետ 2-ով և 190 հոդվածի մաս 3 կետ 1-ով նախատեսված արարքները։
Ըստ մեղադրանքի Ռոբերտ Քոչարյանը Սիլվա Համբաձումյանի ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008 թվականի փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 927 մլն ՀՀ դրամին համարժեք 3 մլն ԱՄՆ դոլար կաշառք։
Քոչարյանը երեկ դատարանում նորից պնդեց՝ Սիլվա Համբարձումյանին ընդհանրապես չի ճանաչում և իր համար ընդհանրապես հասկանալի չէ, թե ինչու է մեղադրող կողմը որոշել, որ ինքն ունի վարչարարատնտեսական իրավասություններ և այս դեպքում չի հասկանում, թե տվյալ դեպքում իր որ լիազորություններն է օգտագործել կամ չի օգտագործել։
Քոչարյանը նաև նշեց, որ լիցենզիայի և վաճառքի հարցերը չեն ենթադրում որևէ պետական որոշում կամ համաձայնություն։
Ինքը՝ Սիլվա Համբարձումյանը, «Առաջին լրատվական»-ի հետ զրույցում նշեց, որ քանի որ գործը հասել է ապացույցների փուլ, ինքը ձեռնպահ կմնա մեկնաբանություններ տալ. «Ես կրկնում եմ, որ իրեն՝ Ռոբերտ Քոչարյանին, չեմ ճանաչել, միջնորդը Սամվելն է Մայրապետյան։ Սամվելի հետ են եղել բոլոր արիշ-վերիշները։ Առերեսման ժամանակ եմ միայն տեսել, հետո էլ չեմ տեսել: Մայրապետյանն ասել է՝ գումարը փոխանցել եմ իրեն, բայց չգիտի ինչի համար։ Ոչ ընդդիմացել է, ոչ էլ… Ես պնդելու եմ իմ՝ ցուցմունքում ասածները»,-ասաց Համբարձումյանը։
Անդրադառնալով լիցենզիա տալու հետ կապված Քոչարյանի պարզաբանումներին՝ Համբարձումյանը նշեց. «Այն ժամանակ այդ ո՞վ էր առանց իրենց գործարք կատարում, ես այս ամբողջ տարիներին իմացել եմ, թե ով ինչպես է առաջ գնացել և ինչ պայմաններում։ Կարող է լիազորություն չի ունեցել օրենքով, բայց գոյություն ունեցել է զանգերի ինստիտուտը։ Ո՞վ չգիտի, որ նախկին իշխանության ժամանակ գոյություն ուներ զանգերի ինստիտուտը»:
Հիմա, նրա խոսքով, մեծամասնությամբ փոփոխվել է, բայց կան տեղեր, որ կաշառքը իր դերն ունի, որտեղ հինը կա, այնտեղ կաշառքը կա։
Սիլվա Համբարձումյանը նշեց, որ լիահույս է՝ այս անգամ արդարությունը կհաղթի։
