Նախօրեին Ադրբեջանի ուղիղ միջամտության հետևանքով Արցախի Հանրապետությունում կրկին դադարեցվել է գազամատակարարումը: Արցախի տեղեկատվական շտաբի փոխանցմամբ, մարտի 8-ին պայթեցված գազատարի վերանորոգման աշխատանքների ընթացքում ադրբեջանական կողմը տեղադրել է փական, որի միջոցով էլ դադարեցրել է գազամատակարարումը։ Ադրբեջանը ստեղծված եղանակային անբարենպաստ պայմանները ծառայեցնում է Արցախի բնակչության համար հումանիտար լրացուցիչ խնդիրներ առաջացնելու նենգ գործին և դիմում հանցավոր քայլի։
Նշվում է, որ Արցախում ռուս խաղաղապահների հրամանատարությունը բանակցում է ադրբեջանական կողմի հետ՝ գազամատակարարումը վերականգնելու համար:
Հիշեցնենք, որ Արցախն ավելի քան տասը օր զրկված էր գազից, գազամատակարարումը վերականգնվել էր մարտի 17-ին, և ահա դրանից մի քանի օր անց կրկին գազամատակարարումը դադարեցվել է:
Այս պահին Արցախում սպասողական վիճակ է, բոլորը սպասում են ռուս խաղաղապահների և ադրբեջանցիների միջև բանակցությունների արդյունքներին: Արցախիցները «Առաջին լրատվական»-ի հետ զրույցում նշեցին, որ որևէ խուճապ Արցախում չկա, մարդիկ սովորել են, գազը չկա, հոսանքն են օգտագործում, դա էլ չլինի փայտ կօգտագործեն. «Մենք ուրիշ գնալու տեղ չունենք: Ոչ տրամադրություն ունենք, ոչ ցանկություն: Մեր հողն է, մնալու ենք. Երկու հազար տարի մեր ժողովուրդն առանց գազ ապրել է, էլի կապրի»:
Արցախի Ազգային ժողովի «Ազատ հայրենիք-ՔԴՄ» խմբակցության ղեկավար Արթուր Հարությունյանը «Առաջին լրատվական»-ի հետ զրույցում նշեց, որ ակնկալում են, որ առաջիկա օրերին նորություն կլինի բանակցություններից. «Արդեն տարբերություն չկա, թե որ մակարդակով են գնում բանակցությունները, ամբողջությամբ պետք է բոլորս միասին արդյունք ապահովենք: Կոնկրետ կարող եմ ասել, որ ռուս խաղաղապահները բանակցությունների գործընթացում ներգրավված են: Եկեք չխանգարենք գործընթացին: Գազն Արցախ հասցնելու այլընտրանքային ճանապարհներ այս պահին չունենք, բայց դա էլ է քննարկվում: Այս պահին դա Հայաստանից եկող միակ գազատարն է»,-ասաց նա՝ բացառելով, թե հնարավոր է Ադրբեջանից գազ ստանալ:
Արցախի նախագահի մամուլի քարտուղար Լուսինե Ավանեսյանը ևս «Առաջին լրատվական»-ի հետ զրույցում նշեց, որ այս պահին խաղաղապահների միջնորդությամբ փորձ է արվում կարգավորել խնդիրը. «Հիմա կոնկրետ ովքեր են բանակցում ռուս խաղաղպահների հետ, ես տեղյակ չեմ, անձերի հետ կապված որևէ բան հաղորդել չեմ կարող»,-ասաց նա: