Ղազախստանի ամենաազդեցիկ գործարարներից մեկը ձերբակալվել է երկու ամսով։ Սաթիբալդին կասկածվում է պաշտոնեական լիազորությունները չարաշահելու և առանձնապես խոշոր չափերով յուրացման մեջ։
Ղազախստանում ձերբակալվել է նախկին նախագահ Նուրսուլթան Նազարբաևի եղբորորդին՝ Կայրաթ Սաթիբալդին։ Նուր-Սուլթանի մասնագիտացված միջշրջանային քննչական դատարանը երեքշաբթի՝ մարտի 15-ին, որոշում է կայացրել նրան կալանքի տակ վերցնել երկամսյա ժամկետով։
Մարտի 13-ին Ղազախստանի հակակոռուպցիոն ծառայությունը հայտարարեց Սաթիբալդիի կալանավորման մասին՝ պաշտոնեական լիազորությունները չարաշահելու և «Ղազախտելեկոմ» ՓԲԸ-ի միջոցները առանձնապես խոշոր չափերով հափշտակելու կասկածանքով։ Ավելի ուշ հակակոռուպցիոն ծառայության ղեկավար Օլժաս Բեկտենովը մանրամասնել է, որ Սաթիբալդիին ձերբակալել են Ալմաթիի օդանավակայանում, երբ վերջինս փորձում էր թռչել Դուբայ։
Ղազախստանի ամենաազդեցիկ գործարարներից մեկը
Կայրաթ Սաթիբալդին հանրապետության նախկին նախագահ Նուրսուլթան Նազարբաևի կրտսեր եղբոր որդին է։ Նա, Forbes-ի Ղազախստանի վարկածով, երկրի ամենաազդեցիկ գործարարներից մեկն է։ 2018թ. նրա կարողությունը գնահատվել է 163 միլիոն դոլար։ 2015-2018թթ. Սաթիբալդին եղել է Ղազախստանի խոշորագույն բանկերից մեկի՝ Կասպիի բաժնետեր, նախկինում էլ ուներ բաժնետոմսեր խոշոր հեռահաղորդակցության օպերատորում:
2016թ., Alatau Capital Invest-ի միջոցով, գործարարը ձեռք է բերել ղազախական «Kazakhtelecom» հեռահաղորդակցության ընկերության բաժնետոմսերի մոտ 4%-ը։ Միևնույն ժամանակ, ըստ մի շարք ղազախական լրատվամիջոցների, Ղազախստանի նախկին նախագահի եղբորորդին նշված է որպես Skyline Investment Company S.A օֆշորային ընկերության միակ հիմնադիրը, որին պատկանում է «Ղազախտելեկոմ» բաժնետոմսերի 24%-ը։
Կայրաթ Սաթիբալդին աշխատել է պետական ծառայության մեջ, եղել է մայրաքաղաքի ակիմի տեղակալ և ղեկավար պաշտոններ զբաղեցրել ազգային ընկերություններում։
