Թուրքիայի և ռուս-ուկրաինական պատերազմի հետ կապված իրադարձությունները պետք է վերլուծել մի քանի մակարդակով։ «Նախևառաջ Թուրքիան փորձում է օգտագործել բոլոր հնարավորությունները՝ աշխարհում իր դերը և նշանակությունը բարձրացնելու համար։ Անկարան այս քաղաքականությունը փաստորեն իրականացնում է վերջին 15 տարվա ընթացքում, երբ սկսեց որպես միջնորդ հանդես գալ արաբա-իսրայալեական հակամարտությունում, հիմա էլ փորձում է որպես միջնորդ հանդես գալ ՌԴ-ի և Ուկրաինայի միջև»,-«Առաջին Լրատվական»-ի հետ զրույցում ասաց ակադեմիկոս Ռուբեն Սաֆրաստյանը։
Մեր զրուցակցի խոսքով՝ Թուրքիան փորձում է նաև հարաբերությունները պահպանել և՛ Ռուսաստանի, և՛ Ուկրաինայի հետ, դեռ ավելին՝ ձգտում է դերակատարում ունենալ Արևմուտք-Ռուսաստան հարաբերություններում։ Ինչ վերաբերում է մեր տարածաշրջանին, ապա Սաֆրաստյանը չի բացառում, որ Անկարան որոշակի փուլում Ադրբեջանի ձեռամբ կարող է դիմել սադրանքների՝ օգտվելով այն հանգամանքից, որ Ռուսաստանի ուշադրության կենտրոնում Ուկրաինան է։ «Սադրանքների միջոցով հնարավոր է ստեղծի մի իրավիճակ, որ Ադրբեջանը հնարավորություն ունենա պահանջելու, որ ռուսական խաղաղապահ ուժերն ավելի շուտ լքեն Արցախի տարածքը»։
