Բրիտանական նավթագազային Shell ընկերությունը դուրս է գալիս ռուսական նախագծերից և դադարեցնում ռուսական հում նավթի գնումները, հայտնում է ընկերությունը։
Որոշումն, ըստ ամենայնի, հեշտ չի եղել ընկերության համար. ուրբաթ օրը Shell-ը գնել է ռուսական նավթի խմբաքանակ՝ պատճառաբանելով այլընտրանքի բացակայությունը։ Ուկրաինայի արտաքին գործերի նախարար Դմիտրի Կուլեբան քննադատել է ընկերությանը, գրում է BBC-ն։
Արեւմտյան երկրները դեռ պատժամիջոցներ չեն կիրառել ռուսական նավթի ներկրման դեմ՝ մտավախություն ունենալով, որ դա կհանգեցնի էներգակիրների առանց այն էլ բարձր գների աճին ամբողջ աշխարհում։ Սակայն, դատելով արևմտյան լրատվական գործակալությունների հաղորդագրություններից, ԱՄՆ-ը և ԵՄ-ն քննարկում են նման հնարավորությունը։
Ռուսաստանի համար նավթի արտահանման սահմանափակումները չափազանց ցավոտ կլինեն։ Օրինակ, Capital Economics բրիտանական վերլուծական ընկերությունը գնահատել է, որ նման պատժամիջոցները կհանգեցնեն Ռուսաստանի ՀՆԱ-ի 25%-ով անկման, իսկ դոլարի փոխարժեքը՝ մինչև 200 ռուբլի: Գնաճն այս դեպքում երկրում կարող է հասնել 30%-ի։
Սա կարող է նաև խթանել երկրում դեֆոլտի գործընթացը. ընկերությունները և բանկերը կարող են սկսել սնանկանալ: Նավթի ու գազի վաճառքից եկամուտներից զրկվելու դեպքում պետությունը չի կարողանա աջակցել նրանց։ Կտրուկ աճում է նաև Ռուսաստանի՝ որպես պետություն սնանկացման հավանականությունը, գրում են փորձագետները։ Ռուսաստանից նավթի և գազի ներկրման ամբողջական արգելքի դեպքում նավթի գինը կբարձրանա մինչև 160 դոլար մեկ բարելի դիմաց, իսկ հետո երկար ժամանակ կպահպանվի բարձր մակարդակի վրա, կանխատեսում է Capital Economics-ը։