Ադրբեջանական Salam News գործակալության փոխանցմամբ՝ հոկտեմբերին Նյու Յորքում տեղի կունենա Կիպրոսի հարցի շուրջ հերթական հանդիպումը։
Այս մասին հայտարարել է Ադրբեջանում ինքնահռչակ Հյուսիսային Կիպրոսի թուրքական հանրապետության ներկայացուցչության ղեկավար Զեքի Գազիօղլուն։
Վերջինիս խոսքերով՝ կիպրական խնդրի վերաբերյալ ՄԱԿ-ի գլխավոր քարտուղարի հետ հերթական հանդիպումը տեղի է ունենալու հոկտեմբերին Նյու Յորքում. «Հաշվի առնելով կիպրական խնդրի կարգավորման շուրջ բանակցությունների լիովին անարդյունավետությունը՝ տվյալ հարցը սկսել է այլևս այդքան շատ չմտահոգել մարդկանց։ Այնուամենայնիվ, կողմերի միջև հանդիպումները շարունակվում են։
Թուրքական կողմն ակտիվորեն փորձում է արդյունքի հասնել, սակայն հակառակ կողմն այդպիսի մտադրություն «չունի»։ Կիպրացի հույները «ցանկանում են» ձգձգել հարցը։ Մարդկանց մոտ ոչ մի հավատ չի մնացել, դրա համար էլ նրանք անուշադրության են մատնել հանրաքվեի անցկացման հարցը»։
Հիշեցնենք, որ հուլիսի կեսերին Էրդողանը հայտարարել էր, որ Անկարան լիովին կսառեցնի ԵՄ հետ հարաբերությունները, եթե 2012 թվականի ամռանը Կիպրոսի Հանրապետության կողմից ԵՄ նախագահության ստանձնման ժամանակ կիպրական խնդիրը կարգավորված չլինի.
«Վեց ամիս մենք հետևելու ենք իրադարձությունների ընթացքին։ Եթե կիպրական հարցը չկարգավորվի, ապա ԵՄ հետ բոլոր հարաբերությունները կսառեցվեն։ Մենք չենք խոսի մի երկրի հետ, որին չենք ճանաչում»։
Էրդողանը նաև դեմ էր արտահայտվել կիպրական հարցի կարգավորման գործընթացում ԵՄ միջամտությանը. «Մենք ԵՄ-ին չենք ճանաչում որպես Կիպրոսի հարցի զրուցակից։ ԵՄ-ը փորձում է այդ խնդիրը քաշել իր կողմը։ Իսկ մենք էլ ասում ենք, որ այդ խնդիրն ամբողջովին պետք է լուծվի ՄԱԿ-ի հարթակում»։
