Գյումրիի «Շիրակ»-ի պաշտոնական կայքից տեղեկանում ենք, որ ակումբը 3 տարվա պայմանագիր է կնքել աշխարհահռչակ ֆրանսահայ ֆուտբոլիստ Յուրի Ջորկաեֆի ընտանիքի հետ։
«Ներկայումս Ջորկաեֆները ակտիվ գործունեություն են ծավալել ֆուտբոլային աշխարհում և համագործակցում են տարբեր ակումբների հետ»,- լրագրողների հետ հանդիպման ժամանակ հայտարարել է Յուրի Ջորկաեֆի եղբայր Դենիսը։
«Շիրակ»-ի նախագահ Արման Սահակյանը հաստատել է, որ կողմերը 3 տարվա պայմանագիր են կնքել և ոչ մի ջանք չեն խնայելու Գյումրիում մանկապատանեկան ֆուտբոլը զարգացնելու համար:
«Կնքվել է 3 տարվա պայմանագիր։ Համագործակցության հիմնական նպատակն է զարգացնել «Շիրակի» մանկապատանեկան դպրոցը: Հիմա մեր ղեկավարության ներքո է Գյումրիի ֆուտբոլի դպրոցը, որտեղ մարզվում են 500 պատանիներ: Սա մեծ համակարգ է, որի զարգացման համար մենք պետք է օգտագործենք համաշխարհային փորձը, կարողանանք համակարգել դպրոցի գործունեությունը, աշխատենք ճիշտ մեթոդներով, քանի որ ԽՍՀՄ փլուզումից հետո այս առումով ոչինչ չի փոխվել:
Մեր ժամանակներում շատ կարևոր է, որպեսզի ֆուտբոլային ակումբները համագործակցեն միջազգային կազմակերպությունների հետ: Դրա համար մենք որոշեցինք համագործակցել Դենիս Ջորկաեֆի հետ, և արդեն սկսել ենք աշխատել միասին: Ամեն ինչ շատ արագ չի ստացվի, սակայն կարծում եմ, որ մոտ ապագայում արդյունքը արդեն կերևա»,- հայտարարել է «Շիրակ»-ի նախագահը։
Դենիս Ջորկաեֆը վստահություն է հայտնել, որ «Շիրակ»-ը ճիշտ ուղու վրա է, և հաջողությունը շուտով տեսանելի կլինի.
«Արման Սահակյանի հետ առաջին հանդիպումը տեղի է ունեցել Լիոնում: Այնուհետև պարոն Սահակյանի հրավերով մենք եկել ենք Հայաստան, այցելել ենք Գյումրի՝ ծանոթանալու «Շիրակ» ֆուտբոլային ակումբի պայմաններին, գտնվել ենք վերակառուցվող մարզադաշտում: Այնուհետև ակումբի հետ ստորագրել ենք երեք տարվա պայամանագիր, որպեսզի մեր կազմակերպության և ակումբի միջև փոխհամագործակցություն սկսվի: Կկազմակերպվի մարզիչիների փորձի փոխանակում, որպեսզի ֆրանսիական ֆուտբոլի տեխնիկան ներմուծվի Հայաստան: Կփորձենք ստեղծել ուժեղ և կայուն ակումբ:
Ինչպես արդեն նշեց պարոն Սահակյանը, մենք արդեն մեկ ամիս է՝ կնքել ենք պայմանագիրը և սկսել ենք սերտորեն համագործակցել: Գիտենք նաև, որ «Շիրակ»-ի հեռանկարային երիտասարդ ֆուտբոլիստ Դավիթ Հակոբյանը փորձաշրջան անցավ «Ցյուրիխ»-ում: Մենք ներկա ենք գտնվել այդ հանդիպմանը և դիտել ենք Դավիթի խաղը: Արդեն մեկ ամիս է, ինչ լրջորեն հետաքրքրվում ենք «Շիրակ» ֆուտբոլային ակումբի առօրյայով, յուրաքանչյուր խաղացողով: Ցանկանում ենք ինչպես հիմնական և երկրորդ, այնպես էլ մանկապատանեկան թիմերի ֆուտբոլիստների խաղային որակները բարձրացնել: Լավ խաղացողները, միանշանակորեն, Հայաստանում չեն մնա, կգնան Եվրոպա:
Արման Սահակյանի ներկայացրած ծրագիրը շատ հետաքրքիր էր, շատ լավ ծրագիր է: Ես ինքս նորեկ չլինելով ֆուտբոլային աշխարհում՝ նմանատիպ ծրագիր առաջին անգամ եմ տեսել: Ներկայացված ծրագիրը նման է Եվրոպական ճանաչված ակումբների ծրագրերին: Ես համոզված եմ, որ «Շիրակ»-ը մի օր կհասնի այդ մակարդակին»:
Լուսանկարը` FCShirak-ի
