ՌԴ պաշտպանության նախարար Շոյգուն հայտարարել է, որ Ուկրաինայում ռազմական գործողությունը կտևի մինչև նպատակին հասնելը: Թե որն է նպատակը, բարձրաձայնել է ՌԴ նախագահ Պուտինը՝ Ուկրաինայի ապառազմականացում և ապազգայնամոլացում: Այլ կերպ ասած, Մոսկվան փաստացի հայտարարում է, որ Ուկրաինայում ռազմական գործողությունը կավարտի միայն այդ երկրում իշխանափոխությունից հետո: Բարդ է պատկերացնել, որ այդ խնդիրը լուծելի է մի քանի շաբաթում կամ մի քանի ամսում անգամ: Ավելի շուտ հնարավոր է պատկերացնել Ուկրաինայում անիշխանություն՝ քաղաքական առումով, իսկ ռազմական առումով երկիշխանություն կամ «եռիշխանություն»: Այսինքն, ռուսական ռազմական ներկայություն, ուկրաինական ռազմական դիմադրություն, և հնարավոր է այլ բնույթի ռազմական խմբավորումներ, որոնք կարող են դրության տեր լինել տարբեր լոկալ հատվածներում:
Համենայնդեպս, այն բանից հետո, երբ Կիևը հայտարարեց օտարերկրյա քաղաքացիներին Ուկրաինայում Ռուսաստանի դեմ կռվելու հնարավորության մասին, երբ բանտերից ազատ արձակվեցին կռվելու ունակ ազատազրկված անձինք, էապես մեծացավ հավանականությունը, որ այդ գործընթացները կարող են դուրս գալ վերահսկողությունից և Ուկրաինան վերածել ուղղակի «գորշ գոտու»: Ըստ էության, Ուկրաիանայի պարագայում մեծ է հավանականությունը այն ամենի, ինչ տեղի ունեցավ Սիրիայում, և թերևս դեռ շարունակում է տեղի ունենալ, իհարկե ոչ այն ծավալներով, որ առկա էին 2012-2015-16 թվականներին:
Ավելին, Ուկրաինայում այսպես ասած «անկառավարելի գոտիների» ձևավորմամբ կարող է շահագրգռված լինել նաև հենց ինքը Ռուսաստանը, որպես գործիքակազմի մաս, այսպես ասած «կառավարելի քաոսի» տրամաբանության շրջանակում: Այս հեռանկարը զգալիորեն կախված է ոչ այնքան Ուկրաինայի իշխանությունից, որքան ԱՄՆ-ից, թե Վաշինգտոնն ինչքանով է հակված քաղաքական համաձայնության գալ Ռուսաստանի հետ: Կամ, որքանով կարող է ինքնիշխան լինել Եվրամիությունը՝ իր հերթին պայմանավորվելով Մոսկվայի հետ: Առայժմ իհարկե շեշտը դրվում է Մոսկվայի վրա հավաքական ճնշման տարբերակի վրա, ինչի արդյունավետությունը սակայն կասկածելի է, մի շարք առանձնահատկությունների, որոշ իմաստով գուցե առաջին հայացքից անտրամաբանական, աննորմալ թվացող առանձնահատկությունների պատճառով, որոնք սակայն վաղուց օրինաչափություն են ռուսական պատմության համար: Ուկրաինայի սիրիականացումը ընթացքի մեջ է:
