Այս գիշեր Լիբիայի ապստամբները ներխուժել են Տրիպոլի: Նրանց հաջողվել է գրավել քաղաքի մեծ մասը: Միայն մեկ օրում զոհերի թիվը հասել է 1300-ի, վիրավորվել են 5000-ը: Ձերբակալվել է Սեյֆ ալ-Իսլամը` Քադդաֆիի որդին, ով կանգնելու է Միջազգային քրեական դատարանի առաջ: Քադդաֆիի մյուս որդի Մուհամմեդը տնային կալանքի տակ է: Ներկայումս մարտեր են ընթանում Տրիպոլիի կենտրոնում` հայտնում է BBC-ն:
Լիբիայում 6-ամսյա դադարից հետո վերականգնվել է ինտերնետ կապը: Ինչպես հաղորդում է BBC-ն, ապստամբները երկրի պետական գլխավոր ինտերնետ-պրովայդերի նկատմամբ վերահսկողություն են հաստատել: Միաժամանակ Լիբիայի հեռախոսակապի երկու ընկերություններ իրենց բաժանորդերի հաշվին 25 դոլարին համարժեք խոսելու ժամանակ են ուղարկել, որպես նվեր:
Մեծ Բրիտանիայի վարչապետ Դեվիդ Քեմերոնը երկրի Անվտանգության խորհրդի արտահերթ նիստ է հրավիրել Լիբիայում տեղի ունեցող իրադարձությունները քննարկելու համար:
BBC-ն հայտնում է իր լրագրողների վրա հարձակման մասին: Երբ լրագրողները մոտենում էին Տրիպոլիի «Կանաչ հրապարակին» նրանց վրա կրակ են բացել հրթիռային զինատեսակներինց:
Չինաստանի արտաքին գործերի նախարարությունն իր զորակցությունն է հայտնել Լիբիայի ժողովրդին` հայտարարելով իրավիճակի կայունացման իր ցանկության մասին: Անցած շաբաթ Լիբիայի ազգային անցումային խորհուրդը հայտարարել էր, որ հարգում է Չինաստանի հետ նախկինում կնքված բոլոր համաձայնությունները և խնդրել էին Պեկինին Լիբիան վերականգնելու գործում աջակցություն ցուցաբերել:
Հարավաֆրիկյան Հանրապետության արտգործնախարարը հերքել է այն լուրերը, որ իր երկիրն ինքնաթիռներ է ուղարկել Քադդաֆիին Լիբիայից դուրս հանելու համար:
Լիբիայի ազգային անցումային խորհրդի ղեկավարությունը կոչ է արել ապստամբներին խուսափել թալանից և բռնություններից:
Խորհրդի ղեկավարներից մեկը` Մահմուդ Ջիբրիլը, մասնավորապես հայտարարել է, որ ապստամբները պետք է խղճով մոտենան Քադաֆիի կողմնակիցներին: Այս մասին Ջաբրիլը հայտարարել է Al-Jazeera-ի եթերում:
Միաժամանակ տեղեկություններ են ստացվում այն մասին, որ մարտերը Տրիպոլիի կենտրոնում շարունակվում են:
Եվրամիությունը կոչ է արել Քադդֆիին անհապաղ հրաժարվել իշխանությունից: Reuters-ը տեղեկացնում է, թե Եվրամիությունը ապստամբներին հիշեցնում է, որ իշխանությունը ստանձնելուց հետո իրենք են պատասխանատու լինելու Լիբիայի քաղաքացիների անվտանգության համար:
Քադաֆիին հրաժարական տալու կոչով է դիմել նաև Ռուսաստանի Դումայի միջազգային հարցերով հանձնաժողովի նախագահ Կոնստանտին Կոսաչովը, որը կասկած է հայտնել, որ Տրիպոլին գրավել են NATO-ի ուժերը և ոչ թե ապստամբները:
14-18 Վենեսուելայի նախագահ Ուգո Չավեսը քննադատել է ԱՄՆ-ին և Եվրոմիության երկրներին Լիբիայի ներքին գործերին խառնվելու համար և կոչ արել աղոթել հանուն Լիբիայի քաղաքացիների: Ըստ Associated Press-ի Չավեսը հայտարարել է. «Ես չգիտեմ, թե որքան ռումբ է այսօր ընկել Տրիպոլիի վրա, բայց վնասվել են դպրոցներ, հիվանդանոցներ և բնակելի տներ»: Լիբիայի ապստամբներին Չավեսն անվանել է «ահաբեկիչների խումբ», իսկ ԱՄՆ-ին մեղադրել Լիբիայի հարստությունները թալանելու մեջ:
14-20 Սաուդական Ալ-Ջազիրա թերթը գրում է. «Լիբիայի ժողովուրդը կազատվի Քադդաֆիից մոտակա օրերին կամ ժամերին»:
Հորդանանյան Ալ-Դուսթուր. «Լիբիացի առաջնորդի խելագարության դարաշրջանի ավարտի սպասումով»:
14-21 Լիբիացի ապստամբներից մեկը BBC-ին տված հարցազրույցում նշել է, որ իրենց մոտ վերջանում է զինամթերքը:
14-23 Լիբիայի ազգային անցումային խորհրդի ղեկավարությունը շուտով Բենգազիից կտեղափոխվի Տրիպոլի:
14-25 Իտալիայի արտաքին գործերի նախարար Ֆրանկո Ֆրատինին հայտարարել է, որ Քադդաֆին պետք է հեռանա, այլապես երկիրն արյունահեղության մեջ կխեղդվի:
14-31 Բրիտանական Guardian-ը գրում է, որ որոշ չհաստատված տեղեկություններ են ստացվում այն մասին, որ Մուամմար Քադդաֆիին տեսել են Ալժիրի հետ սահմանի վրա, և հնարավոր է նա արդեն գտնվում է հարևան երկրում:
14-34 Ամերիկաբնակ լիբիացի մուսուլմաններն աղոթում են Սպիտակ տան առջև:
14-45 Տրիպոլիի բնակիչներն ապստամբներին դիմավորում են մեծ ուրախությամբ` նրանց բաժանելով ջուր և կաթ:
14-53 Լիբիական հեռուստաընկերությունը սիրտ-անոթային հիվանդությունների մասին հաղորդում է ցուցադրում:
14-58 Լիբիայի ազգային անցումային խորհրդի անդամներից մեկը հայտարարել է, որ Քադդաֆիին անհրաժեշտ է կենդանի վերցնել, քանի որ շատ կարևոր է քաղաքակիրթ գործել:
15-17 Քադդաֆիի հավատարիմ զորքերը հրաժարվում են լքել նրա նստավայրը Բաբ ալ-Ազազիայում` հայտնում է Reuters-ը` հավելելով, որ Քադդաֆիի զինվորների մեծ խումբ այս պահին գտնվում է այն հյուրանոցի մոտ, որտեղ հիմնականում արևմտյան լրագրողներ են գտնվում:
15-56 Մեծ Բրիտանիայի վարչապետ Դեվիդ Քեմերոնը հայտարարել է, որ Քադդաֆին պետք է կանգնի դատարանի առջև, սակայն նման որոշում կարող է ընդունել միյան Լիբիայի ժողովուրդը:
15-57 Լեհաստանի արտգործնախարարությունը հայտարարություն է տարածել` շնորհավորելով Լիբիայի ազգային անցումային խորհրդին հաղթանակի կապակցությամբ և առաջարկել իր օգնությունը երկիրը վերականգնելու հարցում:
16-27 Հաագայի Միջազգային քրեական դատարանը Քադդաֆիի որդուն` Սեյֆ ալ-Իսլամին իրենց հանձնելու ուղղությամբ բանակցություններ է վարում լիբիացի ապստամբների հետ:
16-29 Լիբիայի դեպքերի պատճառով նավթի գները միջազգային շուկաներում ընկել են և մեկ բարելի համար հասել 105 դոլարի: Մինչև քաղաքացիական պատերազմի սկիզբը Լիբիան ապահովում էր աշխարհի նավթի արտահանման 2%-ը:
16-47 Բոսնիայի ոստիկանությունը շրջապատել է Սարաևոյում Լիբիայի դեսպանատան շենքը, ուր այսօր ներխուժել էին մի խումբ մարդիկ, ովքեր պոկել էին Մուամմար Քադդաֆիի նկարները և դեսպանատան վրա բարձրացրել Լիբիայի ազգային անցումային խորհրդի հաստատած դրոշը: Այս մասին հայտնում է France Press գործակալությունը:
17-15 ԱՄՆ նախագահ Բարաք Օբամա. «Քադդաֆին պետք է հասկանա, որ իր իշխանության վերջն եկել է, նա պետք է հրաժարվի իշխանությունից: Միացյալ Նահանգները ճանաչում են Լիբիայի ազգային անցումային խորհուրդը որպես այդ երկրի օրինական իշխանություն»:
Մեծ Բրիտանիայի վարչապետ Դևիդ Քեմերոն. «Քադդաֆին պետք է հեռանա, որպեսզի իր սեփական ժողովրդի հանդեպ հանցագործություններ այլևս չկատարի»:
Ֆրանսիայի նախագահ Նիկոլա Սարկոզի. «Քադդաֆին պետք է հեռանա, որպեսզի իր սեփական ժողովրդին ազատի տառապանքներից»:
NATO-ի գլխավոր քարտուղար Անդերս ֆոգ Ռասմուսեն.«Լիբիայի ժողովուրդը 40 տարի շարունակ տառապել է Քադդաֆիի իշխանությունից: Պետք է ստեղծվի նոր Լիբիա` հիմնված ոչ թե վախի, այլ ազատության, ոչ թե բռնապետության, այլ ժողովրդավարության վրա»:
Վենեսուելայի նախագահ Հուգո Չավես. «Մենք տեսնում ենք, թե ինչպես են արևմտյան մի շարք երկրներ ռմբակոծում Լիբիան միայն այն պատճառով, որ այդպես են ցանկացել»:
Համասի ներկայացուցիչ. «Մենք ողջունում ենք ապստամբների մուտքը Տրիպոլի և շնորհավորում մեծ հաղթանակի կապակցությամբ»:
17-33 Լիբիայի նախկին վարչապետ Աբդ ալ-Սալամ Ջալուդը Ալ-Արաբիա հեռուստաընկերությանը տված հարցազրույցում հայտարարել է, որ Մուամմար Քադդաֆին չունի բավականաչափ համարձակություն ինքնասպան լինելու համար:
17-34 Լիբիայի առնչությամբ Ռուսաստանը կոչ է անում միջազգային հանրությանը պահպանել ՄԱԿ-ի Անվտանգության խորհրդի 1970 և 1973 բանաձևերի պահանջները, որի համաձայն արտաքին ուժերը պետք է զերծ մնան անկախ պետությունների ներքին գործերին միջամտելուց:
17-47 Չնայած ազգային անցումային խորհրդի զգուշացմանը, ապստամբները մտնում են Տրիպոլիի բնակիչները տները և զբաղվում թալանով: Լիբիայի մայրաքաղաքի բնակիչներից մեկը BBC-ին ասել է. «Նրանք մտնում են տները և ամեն ինչ գողանում, սա NATO-ի և Լիբիայի համար իսկական աղետ է»:
17-51 Ռուսաստանի ԱԳՆ-ն Տրիպոլիի գրավումը դրական է համարել` նշելով, որ դա ավարտին կհասցնի երկար ձգվող արյունահեղությունը:
17-54 Reuters-ը հղում անելով ականատեսներից մեկին` հայտնում է, որ Լիբիայի վարչապետ Ալ-Բագդադի ալ-Մահմուդին գտնվում է Թունիսի Ջերբա կղզում: