«Առաջին լրատվական»-ի հարցերին պատասխանել է ԱԺ «Քաղաքացիական պայմանագիր» խմբակցության պատգամավոր Գագիկ Մելքոնյանը
Պարոն Մելքոնյան, նախօրեին Զինված ուժերի գլխավոր շտաբում լուրջ կադրային փոփոխություններ տեղի ունեցան, այդ թվում ԳՇ պետի պաշտոնից ազատվեց Արտակ Դավթյանը: Ձեր կարծիքով ինչո՞ւ հիմա տեղի ունեցան այդ փոփոխությունները և ի՞նչ նպատակ են դրանք հետապնդում:
Ես կարծում եմ, որ այդ փոփոխությունները պետք է շուտ արվեին, հապաղել չէր կարելի: Դրանք մի քիչ ուշացած են:
Նկատի ունեք, որ 44-օրյա պատերազմից հետո պետք է այդ փոփոխություններն արվեի՞ն:
Իհարկե, պատերազմից հետո փոփոխություններ պետք է անպայման լինեին: Մարդիկ կային, որ պետք է շուտ հեռանային իրենց պաշտոններից, ուշացրեցին այդ ամենը: Բանակը նոր տեմպ է վերցնելու, գնում է կառուցվածքային փոփոխությունների, դա պետք է շուտ արվեր, լավ է, որ սկսել են այդ գործընթացը, էլի ուշ չի:
Կառավարությունը նոր նախագիծ է ներկայացրել, ըստ որի ԳՇ պետը լինելու է պաշտպանության նախարարի առաջին տեղակալը: Այդ դեպքում ի՞նչ կարգավիճակ են ունենալու ԳՇ պետի տեղակալները:
Մինչև 2008 թվականը գոյություն ուներ պաշտպանության նախարար, փոխնախարարներ և գլխավոր շտաբի պետը համարվում էն նախարարի առաջին տեղակալ: Երբ նախարարը գնում էր ինչ-որ տեղ, նախարարի լիազորությունները կատարելու պարտականությունը դրվում էր գլխավոր շտաբի պետի վրա: Հիմա փոփոխություն է լինելու, կարծես նախարարի տեղակալների թիվն ավելանալու է: Այն ժամանակ ՊՆ-ում ամեն մի վարչության պետ նաև համարվում էր գլխավոր շտաբի պետի տեղակալ: Այդ տեղակալի ինստիտուտները չգիտեմ՝ ինչ պետք է արվի: Ինձ թվում է՝ կրճատվելու են, մնալու են ԳՇ պետի 1-2 տեղակալ:
Պարոն Մելքոնյան, Արմեն Գյոզալյանը նշանակվել է Օպերատիվ գլխավոր վարչության պետ, Սերյոժա Ստեփանյանը՝ Բարոյահոգեբանական ապահովման վարչության պետ, Գոռ Նիկոյանը՝ Հրթիռային զորքերի և հրետանու վարչության պետ, Կարեն Գրիգորյանը՝ ԶՈՒ ինժեներական զորքի պետ: Այս նշանակումները որքանո՞վ են ճիշտ, ըստ ձեզ: Արդյոք լավագո՞ւյն կադրերն են ընտրվել:
Իրենք ընտրել են լավագույններին և նշանակել են, որոնց հետ պետք է շարունակեն աշխատանքը: Որպեսզի կարողանան իրենց հետ աշխատել, պետք է նշանակվեն այն մարդիկ, որոնք ստուգված են: Իրենք համոզված են, որ այդ մարդկանց հետ կարող են առաջ գնալ: Նաև նշանակում են մարդկանց, որոնք գիտակ են այդ գործում, այնպես չէ, որ պատահական մարդ են բերում ու նշանակում:
Աշխատանքից ազատվել է ԳՇ պետ Արտակ Դավթյանը, որը նաև քրեական գործով է անցնում: Ինչո՞ւ իշխանությունն այսքան երկար պահեց Արտակ Դավթյանին իր պաշտոնում:
Դա ես չգիտեմ, այդ հարցը պետք է ուղղեք իրենց: Երբ քրեական գործ էր հարուցվում, պետք է հաջորդ օրը արդեն պաշտոնից ազատեին, ես այդպես եմ կարծում: Չի կարող մարդը մնալ պաշտոնի, երբ իր նկատմամբ քրեական գործ ես հարուցել:
Արտակ Դավթյանը կկանչվի՞ 44-օրյա պատերազմի հանգամանքներն ուսումնասիրող ԱԺ քննիչ հանձնաժողով:
Բոլորը կկանչվեն:
Օրինակ, Մովսես Հակոբյանն արդեն հայտարարել է, որ չի գալու քննիչ հանձնաժողով:
Այո, ասել է, բայց երբ որ իր մասով վկայություններ, ցուցմունքներ կտան, ինքն արդեն պետք է գա, որ ապացուցի, որ այդպես չի, կամ այդպես է: Ո՞նց կարող է չգալ:
