Ադրբեջանի նախագահ Ալիևը Մոսկվայում հանդիպելով տեղի պետական լրատվական գործակալությունների խմբագիրներին, խոսել է Ռուսաստան-Ադրբեջան-Թուրքիա եռակողմ ձևաչափի մասին, որն ըստ նրա կձևավորվի մոտ ապագայում՝ հաշվի առնելով ռեգիոնալ և աշխարհաքաղաքական իրողությունները: Ալիևը որսացել է այդ գաղափարի մասին հրապարակումները, որ ռուսական փորձագիտական դաշտի ներկայացուցիչները մատուցել են ադրբեջանական պրոպագանդիստական լրատվադաշտի հարթակներից: Բացառված չէ նաև, որ այդ «գաղափարը» հենց Ալիևի ուղիղ պատվերն է:
Բոլոր դեպքերում, Ուկրաինայի հանդեպ Ռուսաստանի պատերազմական գործողությունն ու ըստ այդմ ձևավորվող նոր աշխարհաքաղաքական իրողությունները ստիպում են ուշադրությամբ հետևել Մոսկվայում Ալիևի հնչեցրած գաղափարներին, այդ թվում մասնավորապես նաև գազի մատակարարումների վերաբերյալ: Նա հայտարարել է, որ Բաքուն ու Մոսկվան կարող են համակարգել Եվրոպա գազի մատակարարումները: Ալիևի վարքագիծը անկասկած ինդիկատորային է, ուշադրոության արժանի: Օրեր առաջ Եվրոպա գազի անխափան մատակարարումների համար ՆԱՏՕ-ի գլխավոր քարտուղարի երախտիքին, ինչպես նաև էներգետիկ սեկտորում Եվրամիությունից 2 միլիարդ դոլարի ներդրումային պատրաստակամության արժանացող Ալիևը այսօր հայտարարում է գազամատակարարումը Ռուսաստանի հետ համակարգելու համար:
Ի՞նչ է սա, «ինքնապաշտպանական բնազդով» թելադրված շեղում դեպի Ռուսաստան և Մոսկվային հավաստիացում, որ Ադրբեջանը չի՞ խանգարի Մոսկվային կիրառել գազային լծակը ԵՄ դեմ, թե՞ Եվրամիության ու Ռուսաստանի միջև գազային թեմայով միջնորդ լինելու ակնարկ, այն սպասումով, թե ինչ արձագանք կգա Եվրոպայից, որտեղ ուկրաինական պատերազմի բռնկումից հետո բորսայում գազի գինը հասել է 1000 խմ դիմաց 1400 եվրոյի, այդպիսով աճելով 35 կետով: Այդ հանգամանքները Հայաստանում արժանի են բավականին ուշադիր դիտարկման, քանի որ կարող են արտացոլել ուկրաինական պատերազմի կովկասյան հնարավոր մետաստազների կամ ազդեցության նախնական ուրվագծեր, հնարավոր գերակա միտումներ, որոնք Հայաստանից կարող են պահանջել թե «ադապտունակություն», թե միաժամանակ մրցունակություն՝ աշխարհաքաղաքական փոխակերպումների համատեքստում, մասնակից խոշոր և ռեգիոնալ դերակատարներին Հայաստանից որոշակի «փափուկ» պատկերացումներ ու գաղափարներ հրամցնելու իմաստով:
