Ադրբեջանական Trend լրատվական գործակալության փոխանցմամբ՝ Ադրբեջանի պաշտպանության նախարար Սաֆար Աբիևն ու Ադրբեջանում Թուրքիայի դեսպան Հուլուսի Քըլըչը քննարկել են երկու երկրների միջև ռազմական համագործակցության հարցը։ Այս մասին հայտարարել է Ադրբեջանի պաշտպանության նախարարության մամլո ծառայությունը։
Հանդիպման ժամանակ կողմերը մտքեր են փոխանակել ռազմական ոլորտում համագործակցության հեռանկարների շուրջ։ Հուլուսի Քըլըչն Աբիևին է ներկայացրել Ադրբեջանում Թուրքիայի նորանշանակ ռազմական կցորդ, բրիգադի գեներալ Յուջել Քարաուզին։
Հիշեցնենք, որ Թուրքիայի բարձրագույն ռազմական խորհրդի (YAŞ) օգոստոսի 4-ի որոշմամբ՝ Յուջել Քարաուզը նշանակվել է Ադրբեջանում Թուրքիայի նոր ռազմական կցորդ՝ այդ պաշտոնում փոխարինելով գեներալ-մայոր Օզհան Այաշին։
Յուջել Քարաուզը սրանից առաջ ղեկավարում էր Թուրքիայի զինված ուժերի 4-րդ հրամանատարության բրիգադը, որը տեղակայված է արևելյան Թունջելի (նախկին Դերսիմ) նահանգում։
