Հայաստանը դարձել է հին մեքենաների երկիր: «Առաջին լրատվական»-ի հետ զրույցում ավտովարորդների իրավունքների պաշտպանության «Աքիլես» կենտրոնի նախագահ Էդուարդ Հովհաննիսյանը փաստեց, որ արտասահմանից հին մեքենաներ շատ են ներկրում:
Ողջ աշխարհում գործընթացներ են ծավալվում, որպեսզի վարորդները հրաժարվեն հին մեքենաներից, եվրոպական երկրներում դրանք արգելված են՝ թե՛ էկոլոգիական, թե՛ անվտանգության նկատառումներից ելնելով: Սակայն, Է. Հովհաննիսյանի խոսքով, ԱՊՀ երկրները շարունակում են հին մեքենաների շահագործումը, իսկ Հայաստանն առաջատար է այդ առումով. «Մենք փոքր երկիր ենք, ու արդեն ունենք մոտ 450 հզ. մեքենա, որից մոտ 80%-ը 10 տարուց ավելի է շահագործվել, այսինքն` հին է»:
Հին մեքենաների շահագործման առումով նախկին ԽՍՀՄ տարածքում բացառություն են կազմում Վրաստանն ու Ադրբեջանը: Մասնավորապես, Վրաստանում մշակվել է օրենքի նախագիծ, որով կարգելվի երկիր ներկրել կամ նույնիսկ տարանցել 15 տարուց ավելի հին մարդատար մեքենաներ, իսկ երկրի ներսում մեքենաների շահագործման առավելագույն տարիք կսահմանվի 20 տարին։
ՀՀ տրանսպորտի և կապի նախարարությունից մեզ հայտնեցին, որ Հայաստանում տարիքային սահմանափակում գործում է երթուղային տաքսիների համար`15 տարի:
ԱՊՊԱ-ի գործունեությունը սկսվելուց առաջ ՀՀ-ում խոտանվել է մոտ 50-70 հզ. մեքենա: Է. Հովհաննիսյանը նշեց, որ կառավարությունն այս տարի ԱԺ չի ներկայացրել գույքահարկի մասին օրենքի փոփոխություն, ինչպես նախորդ տարիներին էր արվում: Դրանով խոտանվող մեքենայի սեփականատերն ազատվում էր կուտակված պարտքից. «Այն մարդիկ, ովքեր հիմա են խոտանում, ստիպված են լինում գործ ունենալ թաղապետարանի հետ՝ կուտակված 15-20 տարվա գույքահարկը վճարելու համար»:
