Այն, որ սահմանադրական բարեփոխումների խորհրդի աշխատանքը կհանգեցնի սահմանադրական փոփոխությունների և ինչ ծավալով դրանք կիրականացվեն, կախված է լինելու երկու հանգամանքից: Այս մասին «Առաջին լրատվական»-ի հետ զրույցում նշեց ԱԺ պետաիրավական հարցերի հանձնաժողովի նախագահ Վլադիմիր Վարդանյանը:
«Առաջինը այն խնդիրների վեր հանումն է, որոնք խոչընդոտում են երկրի բնականոն սահմանադրական զարգացմանը, և երկրորդ, համապատասխան քաղաքական ցանկություն կամ նպատակահարմարություն այդ գործընթացն առաջ տանելու: Դուք գիտեք, որ Սահմանադրությունը 2015-ից ունի ճկուն փոփոխման մեխանիզմ: Այն կարող ենք փոխել թե ԱԺ-ի կողմից, թե հանրաքվեի միջոցով: Դատական իշխանության հետ կապված իրավահարաբերությունները հանրաքվեի տիրույթում են և մենք պետք է պարզապես նախ այս պահի դրությամբ գույքագրենք այն խնդիրները, որոնք առկա են գործող սահմանադրական կարգավորումներում: Դրանց մի մասը գույքագրվել է, բայց մի մոռացեք, որ առաջին սահմանադրական փոփոխությունների հանձնաժողովը գործել է մինչև 44-օրյա պատերազմը, իսկ պատերազմից հետո մենք նոր մարտահրավերների բախվեցինք, որոնք վեր հանեցին Սահմանադրության այն դրույթները, որոնցում անհրաժեշտություն կառաջանա որոշակի շտկումներ իրականացնել»,-ասաց նա:
