«Վատ է, որ երկխոսությունն այսպիսի ընթացք ստացավ, որովհետև արդեն անցել էին օրակարգային խնդրի քննարկմանը»,- «Առաջին լրատվական»-ի հետ զրույցում, գնահատելով ՀԱԿ-իշխանություն երկխոսության ներկայիս ընթացքը, կարծիք հայտնեց հրապարակախոս Հրանտ Տեր-Աբրահամյանը:
Տեր-Աբրահամյանի կարծիքով՝ դժվար է այս պահին ասել, թե այդ օգոստոսի 9-ին ՀԱԿ ակտիվիստների և ոստիկանության միջև կատարված միջադեպն, ի վերջո, պատահականությո՞ւն էր, թե՞ դրա հետևում, այնուամենայնիվ, ինչ-որ քաղաքականություն կար, թե՞ իշխանության ներսում ուղղակի բազմակենտրոն պրոցեսներ են տեղի ունենում: Սակայն, ըստ հրապարակախոսի, սա այն հարցը չէ, որի պատճառով պետք էր տապալել երկխոսության ընթացքը. «Կարծում եմ, այդ հարցի լուծումը հեշտ է` պետք է տղաներին ազատել և շարունակել պրոցեսը: Սակայն եթե այս վիճակն այսպես էլ ձգվի, ապա պրոցեսն ընդհանրապես կտապալվի, քանզի եթե նույնիսկ նման կարգի հարց չի ստացվում լուծել, ապա ավելի մեծ հարցերն էլ ավելի դժվար կլինի լուծել»:
Երկխոսության նման անորոշ, ձգձգվող և հաճախ ոչ թափանցիկ ընթացքից, ըստ Հրանտ Տեր-Աբրահամյանի, դժվար թե դեռևս հասարակական հիասթափություն լինի, այդուամենայնիվ սպասողական վիճակը դրական գնահատել չի կարելի. «Իհարկե, այս ընթացքում թափանցիկությունը նվազել է, և դա խնդիր է: Կարծում եմ, դա ժամանակավոր խնդիր է` կապված կատարված միջադեպի հետ: Եթե միջադեպը հարթվի և երկխոսությունը մտնի բնականոն հունի մեջ, հուսով եմ, որ ավելի հրապարակային կդառնա գործընթացը:
Իսկ այս պահին անորոշությունն ու ինֆորմացիայի պակասը, իհարկե, դրական չեն կարող ազդել հասարակության ընկալման վրա»:
