Գեղարքունիքի մարզի համայնքներում, 2021 թվականի ամփոփ տվյալներով, տեղական բյուջեների սեփական եկամուտները հավաքագրվել են 99, 2 տոկոսով։
Ինչպես տեղեկացրեց Գեղարքունիքի մարզպետարանի ֆինանսական եւ սոցիալ-տնտեսական զարգացման վարչության պետ Յուրա Մուշեղյանը, Գեղարքունիքի մարզի 57 համայնքների սեփական եկամուտների տարեկան պլանային թիվը կազմում է 2 միլիարդ 280 միլիոն 275 հազար 600 դրամ, որը նախորդ տարվա նկատմամբ ավել է պլանավորվել 157 միլիոն 570 հազար դրամով։
Սեփական եկամուտների կատարողականը կազմել է 99,2 տոկոս կամ պլանավորված 2 միլիարդ 280 միլիոն 275 հազար 600 դրամի դիմաց փաստացի հավաքագրվել է 2 միլիարդ 261 միլիոն 940 հազար 600 դրամ։ Փաստացի հավաքագրված թիվը նախորդ տարվա նկատմամբ ավել է 394 միլիոն 589 հազար 300 դրամով։ «100 տոկոսից բարձր կատարողական ապահովել են Ներքին Գետաշենը՝ 186,4 տոկոս, Վաղաշենը՝ 161 տոկոս, Երանոսը՝ 137,1 տոկոս, Մարտունի քաղաքը՝ 124,1 տոկոս, Ձորագյուղը՝ 122,8 տոկոս, Սեւան քաղաքը՝ 113,6 տոկոս, Գեղամավանը՝ 113,1 տոկոս, Ճամբարակ խոշորացված համայնքը՝ 112, 9 տոկոս։ Ամենացածր կատարողական ապահովել են՝ Ծաղկաշենը՝ 44,3 տոկոս եւ Ախպրաձորը՝ 46,7 տոկոս»,-ներկայացրեց Յուրա Մուշեղյանը։
