ԱՄՆ պետքարտուղարությունը հրապարակել է ահաբեկչության դեմ պայքարի 2010 թ. հաշվետվությունը` ըստ երկրների:
Հայաստանին վերաբերող հատվածում նշվում է, որ Հայաստանը 2010 թ. մի շարք դրական քայլեր է ձեռնարկել միջազգային ահաբեկչության դեմ պայքարում: Մասնավորապես մեր երկիրը արտահանման վերահսկման օրենքներում փոփոխություններ է կատարել, բարելավել է սահմանային անվտանգությունը և իր ռազմական փորձագետներին հակահաբեկչական ուսումնավարժանքների է ուղարկել:
Զեկույցում նշվում է, որ Հայաստանի սահմաններին տեղադրվել է սահմանների կառավարման տեղեկատվական ավտոմատացված համակարգ, թարմացվել են ոստիկանական հսկողության տակ գտնվող ահաբեկիչների և այլ հացագործների ցուցակները, ինչպես նաև 2010 թ. Հայաստանը վավերացրել է Միջուկային ահաբեկչական գործողությունների դեմ պայքարի մասին կոնվենցիան, մասնակցել տարբեր ծրագրերի, որոնց նպատակն է եղել կանխել ահաբեկիչների կողմից մաքսանենգ ճանապարհով քիմիական նյութեր տեղափոխելու հնարավորությունները:
Զեկույցում նշվում է այն մասին, որ Հայաստանը զարգացնում է NATO-ի հետ հակաահաբեկչական համագործակցությունը` ներկայացնելով անհատական գործընկերության մասին նոր ծրագիր, որում մեր երկիրը հայտնում է իր պատրաստակամությունը՝ ահաբեկչության դեմ պայքարը շարունակելու գործում: