Ադրբեջանական 1news.az-ի փոխանցմամբ՝ ԱՄՆ պետդեպարտամենտը հրապարակել է ահաբեկչության մասին 2010 թվականի զեկույցը։ Վերջինիս ադրբեջանական հատվածում նշված է, որ Ադրբեջանն ակտիվացրել է իր ջանքերն ահաբեկչության դեմ և հասել է որոշակի հաջողությունների՝ ահաբեկչական միջնորդների առկայության կրճատման ու նրանց գործունեությանը խոչընդոտներ հարուցելու համար.
«Ադրբեջանն ակտիվորեն հանդես է գալիս ահաբեկչական կազմակերպությունների դեմ, որոնք փորձում են Կովկասի միջոցով զենք ու գումարներ ուղարկել ահաբեկիչներին։ Ադրբեջանի իրավապահ մարմինները շարունակում են հետապնդել Ադրբեջանի տարածքում գործող ահաբեկչական խմբերին ու միջնորդներին։
Ադրբեջանի կառավարությունը շարունակում է օրենսդրության ներդրմամբ փողերի լվացման դեմ պայքարը, ֆինանսավորում է հակաահաբեկչական գործունեությունը, ինչպես նաև հիմնել է Ֆինանսական հետաքննությունների բաժին (Financial Investigative Unit – FIU)։
Ադրբեջանը շարունակում է կասկածելի ահաբեկչական խմբերի ու անհատ անձանց ցանկի տարածման միջոցով տեղական բանկերում հայտնաբերել ահաբեկչության հետ կապված ֆինանսներ»։
Զեկույցի ուշադրությունից չի վրիպել նաև այն, որ սեպտեմբերին Ադրբեջանը պետսահմանի մասին համաձայնագիր է ստորագրել Ռուսաստանի հետ։ Նոյեմբերի 18-ին էլ մերձկասպյան երկրների միջև կնքվել է մաքսանենգության, թմրաբիզնեսի, կազմակերպված հանցավորության ու ահաբեկչության դեմ պայքարի մասին համաձայնագիրը։
