«ԽՍՀՄ-ը չի փլուզվել, այլ լուծարվել է դավաճանության պատճառով` մի երկու-երեք թափթփուկի ստորագրությունների արդյունք է դա, որովհետև հենց այդ տարիներին անցկացված հանրաքվեն ցույց տվեց, որ բնակչության 75 տոկոսը կողմ է պահպանել ԽՍՀՄ-ը»,- «Առաջին լրատվականի» հետ զրույցում, գնահատելով ԽՍՀՄ փլուզման հանգամանքը, ասաց Հայաստանի կոմունիստական կուսակցության կենտկոմի առաջին քարտուղար Ռուբեն Թովմասյանը:
Նա նշեց, որ ԽՍՀՄ լուծարումից հետո՝ անցած 20 տարիների ընթացքում ԽՍՀՄ գրեթե բոլոր հանրապետություններում վատ մթնոլորտ է` մարդասպանություն, գողություն, թալան, պատերազմներ, աղքատություն, կոռուպցիա:
Թովմասյանը նաև նշեց, որ ԽՍՀՄ-ը շատ կենսունակ էր, և այնտեղ ամեն ինչ համաչափ պլանավորված ընթանում էր:
«ԽՍՀՄ-ի տարիներին այն ամենը, ինչ կենսական էր մարդու համար, անվճար էր` բնակարան, կրթություն, առողջապահություն, իսկ այսօր փորձեք մտնել մի բուհ կամ առողջապահական հիմնարկ՝ բոլորը վճարովի են»,- ԽՍՀՄ տարիները հիշեց Ռուբեն Թովմասյանը և հավելեց, որ այն տարիներին բոլորն աշխատում էին և կարողանում էին պահել իրենց ընտանիքը, իսկ այսօր մարդիկ հեռանում են սեփական հայրենիքից` դրսում ապրուստ գտնելու նպատակով:
Ռուբեն Թովմասյանն ասաց, որ ավելորդ է վատ բաներ խոսել ԽՍՀՄ-ի մասին, հակակոմունիստական հիստերիա բարձրացնել, քանզի մարդիկ իրենց աչքով են տեսնում, թե ինչ ծանր է եղել վիճակը ԽՍՀՄ-ից հետո՝ 20 տարիների ընթացքում:
