Ղազախստանում ծավալվող զարգացումները Հայաստանում արժանացել են մեծ ուշադրության, դրանք բավականին լայն մեկնաբանությունների ու արձագանքների են արժանանում սոցցանցային տիրույթում: Միաժամանակ կասկածից վեր է, որ տեղի ունեցողն իր ռեգիոնալ և աշխարհաքաղաքական համատեքստով պահանջում է Հայաստանի հանգամանալից ուշադրությունը, հասկանալու համար զարգացման հնարավոր ուղղություններն ու բովանդակությունը, ըստ այդմ հնարավոր ազդեցությունները, ռիսկերը կամ անգամ հնարավորությունները: Այդ ամենով հանդերձ, թերևս դիտարկման հարցերից մեկն էլ կարող է լինել այն, թե արդյյո՞ք ղազախական օրինակը կարող է կիրառվելու գայթակղություն առաջացնել հայաստանյան ընդդիմության շրջանում, հատկապես նկատի ունենալով այն, որ արմատական ընդդիմության առաջնորդները հայտարարում են հասարակայան ընդվզում նախապատրաստելու կամ հասունացնելու մտադրության մասին:
Իհարկե Ղազախստանի համեմատ Հայաստանի դեպքում կա երկու տարբերություն՝ երկու էական տարբերություն: Նախ, կա գործող իշխանության լեգիտիմություն և հասարակական որոշակի աջակցություն, և բացի այդ կա հասարակական մեծ անվստահություն այն ընդդիմության հանդեպ, որը հայտարարում է ընդվզում պատրաստելու մասին: Այդուամենայնիվ, դրանով հանդերձ, հարցը թերևս մնում է՝ կարո՞ղ է արդյոք Ղազախստանի օրինակը Հայաստանի արմատական ընդդիմության համար լինել վարակիչ կամ գայթակղիչ, երբ փորձ կարվի օգտագործել Հայաստանում օրինակ գնաճի հանգամանքը: Բայց, այդպիսի գայթակղության տրվելը Հայաստանում ընդդիմության համար թերևս կլինի ոչ ռացիոնալ, հենց այն իրողության բերումով, որ Հայաստանում ներկայումս այդ ընդդիմության հանդեպ անվստահությունը նկատելիորեն ավելին է, քան անվստահությունը գործող իշխանության հանդեպ, որ անշուշտ կա հանրային տարբեր շրջաննակներում: Ահա այդ դասավորության, ուժերի այդ հարաբերակցության պարագայում «երաշխավորված» կարող է լինել մի բան՝ Հայաստանի իրավիճակի ծանրացումն ու Հայաստանի հանդեպ բազմաբնույթ մարտահրավերների ուժգնացումը: Առավել ևս, երբ դեռ բոլորովին պարզ չէ անգամ, թե ինչ է լինելու իրադարձությունների արդյունքը կամ հետևանքը հենց Ղազախստանում: Այդ առումով, Հայաստանում պարզապես քաղաքական անմեղսունակություն է Ղազախստանում տեղի ունեցողի հանդեպ որևէ ոգևորություն, առնվազն քանի դեռ իրադարաձություններն այնտեղ ծավալվում են բավականին անորոշ տրամաբանությամբ և սցենարով:
