Մարդու իրավունքների պաշտպանի գրասենյակից հայտնում են, որ այսօր Մարդու իրավունքների պաշտպանի գրասենյակ են այցելել 50-ից ավելի կրպակատերեր՝ «Ժառանգություն» կուսակցության ներկայացուցիչների հետ: Նրանք հանդիպում խնդրեցին Պաշտպան Կարեն Անդրեասյանից և ներկայացրեցին իրենց բողոքը կրպակների ապամոնտաժման գործընթացի դեմ և դժգոհությունը Երևանի քաղաքապետարանի որոշումներից:
Մարդու իրավունքների պաշտպանը կրպակատերերին ներկայացրեց իրենց իրավունքների պաշտպանության ուղիները և բացատրեց իր լիազորությունները, ինչպես նաև ներկաներին առաջարկեց Պաշտպանին դիմել անհատական դիմումներով՝ յուրաքանչյուր գործ առանձին քննարկելու և որոշումներ կայացնելու նպատակով: Նա ընդգծեց, որ Պաշտպանը կարող է աջակցել դիմումատուներին իրավական լուծումներով: Իսկ, երբ խնդիրը դուրս է իրավական դաշտից, ապա քաղաքական պայքարին Պաշտպանը մասնակցել չի կարող, սակայն կարող է միջամտել, որպեսզի հարգվի և պաշտպանվի յուրաքանչյուրի՝ օրինական ճանապարհներով իր կենսական շահերի համար պայքարելու իրավունքը:
Ի պատասխան կրպակատերերի խնդրանքին՝ դիմել Սահմանադրական դատարան քաղաքապետարանի որոշումների Սահմանադրության համապատասխանության հարցը որոշելու նպատակով, Պաշտպանն ասաց, որ այդ առաջարկը ևս մանրամասն քննարկման կարիք ունի և բացատրեց յուրաքանչյուր գործողության ընթացակարգերն ու ժամկետները, նաև խոստացավ, որ այսօրվանից գրասենյակը կուսումնասիրի Սահմանադրական դատարան դիմելու հնարավորությունները և հնարավոր բոլոր հիմքերը:
Պաշտպանը հաստատեց օգոստոսի 16-ի կրպակների ապամոնտաժման գործընթացի վերաբերյալ իր անդրադարձի սկզբունքները ու շեշտեց, որ առաջիկայում ևս հետևողական կլինի կրպակատերերի գույքային իրավունքի ոտնահարման դեպքերը, իր լիազորությունների շրջանակներում, բացահայտելու և խախտված իրավունքը վերականգնելու առումով:
